Гуманітарнае супрацоўніцтва

Беларусь накіравала гуманітарную дапамогу пацярпелым ад паводак жыхарам Кеніі

6 лютага, Мінск /Кар. БЕЛТА/. Беларусь накіравала гуманітарную дапамогу пацярпелым ад паводак жыхарам Кеніі. Аб гэтым БЕЛТА паведамілі ў МНС.

Для пераадолення наступстваў маштабных паводак і затапленняў, якія ахапілі краіну мінулай вясной, па даручэнні кіраўніка дзяржавы накіраваны груз масай каля 7 т і коштам больш за Br500 тыс. У склад гуманітарнай дапамогі ўвайшлі каркасныя палаткі, выдзеленыя з Дзяржрэзерву МНС, а таксама адзенне і абутак для дзяцей і дарослых, прадастаўленыя прадпрыемствамі канцэрна "Беллегпрам". Груз плануецца даставіць аўтамабільным транспартам да Санкт-Пецярбурга, адкуль дапамога накіруецца ў марскі порт горада Мамбаса на поўдні Кеніі.

Беларусь рэгулярна аказвае гуманітарную дапамогу краінам, якія пацярпелі ад надзвычайных сітуацый. Так, з 1999 года наша краіна аказала міжнародную гуманітарную дапамогу 86 разоў 34 краінам. У мінулым годзе Беларусь двойчы аказвала гуманітарную дапамогу (Расійскай Федэрацыі і Рэспубліцы Зімбабвэ).

версія для друку

зрабіць стартавай

дабавіць у выбранае