Прэзідэнцкія выбары-2025 у Беларусі
ЦВК: ад грамадзян і наглядальнікаў скаргі аб парушэннях выбарчага заканадаўства не паступалі
3 лютага, Мінск /Кар. БЕЛТА/. Ад грамадзян і наглядальнікаў скаргі аб парушэннях патрабаванняў выбарчага заканадаўства не паступалі. Аб гэтым паведаміў старшыня Цэнтральнай выбарчай камісіі Ігар Карпенка на пасяджэнні ЦВК, перадае карэспандэнт БЕЛТА.
"Ад грамадзян або наглядальнікаў скаргі аб парушэннях патрабаванняў выбарчага заканадаўства ў працэсе галасавання або пры падліку галасоў, якія маглі б паўплываць на вынікі выбараў, не паступалі", - адзначыў Ігар Карпенка.
Паколькі ў адпаведнасці з выбарчым заканадаўствам участкі для галасавання за мяжой не ствараліся, для арганізацыі галасавання грамадзян Рэспублікі Беларусь, якія пастаянна пражываюць за мяжой і знаходзяцца на консульскім уліку, было вызначана па адным участку ў кожным абласным цэнтры і Мінску. "У галасаванні прынялі ўдзел 114 грамадзян названай катэгорыі. Традыцыйна былі прыняты меры па стварэнні дадатковых умоў для ўдзелу ў выбарах асоб з абмежаванымі фізічнымі магчымасцямі. Да іх належаць і размяшчэнне памяшканняў для галасавання, як правіла, на першых паверхах будынкаў, забеспячэнне наяўнасці пандусаў, належнае асвятленне, лупы і трафарэты для самастойнага запаўнення бюлетэняў асобамі, якія слаба бачаць, і сляпымі грамадзянамі. Вырабляліся інфармацыйныя матэрыялы аб кандыдатах шрыфтам Брайля", - расказаў кіраўнік ЦВК.
Для ажыццяўлення кантролю за выкананнем парадку і правіл правядзення перадвыбарнай агітацыі ў сродках масавай інфармацыі быў створаны Наглядальны савет. У яго склад увайшлі спецыялісты ў галіне рэдакцыйна-выдавецкай дзейнасці і сродкаў масавай інфармацыі, рэкамендаваныя Міністэрствам інфармацыі Беларусі, грамадскімі аб'яднаннямі журналістаў.
Праведзеныя выбары Прэзідэнта Беларусі завяршылі электаральны цыкл па фарміраванні органаў дзяржаўнага кіравання на аснове абноўленага канстытуцыйнага заканадаўства, падкрэсліў кіраўнік ЦВК. "Наша задача на бліжэйшую будучыню - абагульненне практыкі прымянення выбарчага заканадаўства з улікам меркавання арганізатараў выбараў, выпрацоўка прапаноў па ўдасканаленні заканадаўства і выбарчых працэдур, у тым ліку з прымяненнем элементаў лічбавізацыі", - адзначыў ён.
"Плануецца выраб зборніка электаральнай статыстыкі і асобнага выдання аб праведзенай кампаніі з аналітычнымі артыкуламі, інфаграфікай, прэзентацыйнымі матэрыяламі", - дапоўніў Ігар Карпенка.
"Хачу таксама паведаміць, што 28 студзеня Прэзідэнтам Рэспублікі Беларусь падпісаны ўказ аб праекце міжнароднага дагавора, якім адобраны праект пратакола аб унясенні змяненняў у дагавор паміж Рэспублікай Беларусь і Расійскай Федэрацыяй аб роўных правах грамадзян. На аснове ўказа будзе прадоўжана работа па заканадаўчым замацаванні правоў грамадзян Рэспублікі Беларусь на ўдзел у выбарах мясцовых органаў улады ў Расійскай Федэрацыі, - адзначыў Ігар Карпенка. - У адпаведнасці з артыкулам 58 Выбарчага кодэкса грамадзяне Расійскай Федэрацыі, якія пастаянна пражываюць у Рэспубліцы Беларусь, маюць права ў парадку, прадугледжаным кодэксам, удзельнічаць у выбарах дэпутатаў мясцовых Савета дэпутатаў у адпаведнасці з міжнародным дагаворам Рэспублікі Беларусь і Расійскай Федэрацыі. Гэта пагадненне будзе садзейнічаць збліжэнню і ўмацаванню адносін у рамках Саюзнай дзяржавы ў электаральнай сферы".
версія для друку
зрабіць стартавай
дабавіць у выбранае