Прэзідэнцкія выбары-2020 у Беларусі

МЗС накіравала запрашэнні на выбары ў адрас міжнародных наглядальнікаў

Фота з архiва

16 ліпеня, Мінск /Кар. БЕЛТА/. Міністэрства замежных спраў накіравала запрашэнні ў адрас міжнародных арганізацый, якія ажыццяўляюць назіранне за выбарамі. Аб гэтым заявіў журналістам начальнік упраўлення інфармацыі і лічбавай дыпламатыі МЗС Анатоль Глаз, паведамляе БЕЛТА.

Прадстаўнік МЗС, у прыватнасці, пракаменціраваў інфармацыю, што БДІПЧ АБСЕ не плануе ажыццяўляць назіранне за прэзідэнцкімі выбарамі ў Беларусі. Ён адказаў на пытанне, ці запрашаў беларускі бок наглядальнікаў.

"Так, шчыра кажучы, рашэнне БДІПЧ стала для нас расчароўваючай нечаканасцю. Вельмі спадзяёмся, што яно будзе перагледжана. Паколькі 15 ліпеня, дакладна ў дзень пасля рэгістрацыі кандыдатаў, у поўнай адпаведнасці з раней зробленымі публічнымі заявамі МЗС накіравала запрашэнні на выбары ў адрас Бюро па дэмакратычных інстытутах і правах чалавека АБСЕ, Садружнасці Незалежных Дзяржаў і Шанхайскай арганізацыі супрацоўніцтва. Гэта нашы традыцыйныя партнёры па назіранні за выбарамі. Мы ні на крок не адступаем ад сваіх запэўненняў і абавязацельстваў, у тым ліку ў рамках АБСЕ", - заявіў Анатоль Глаз.

Ён падкрэсліў, што Беларусь ніколі не праводзіла выбары без назірання. "І на гэты раз мы першапачаткова цвёрда мелі намер запрасіць наглядальнікаў БДІПЧ АБСЕ пасля рэгістрацыі кандыдатаў. Аб гэтым неаднаразова гаварылася публічна, гэта пазіцыя даводзілася да нашых заходніх партнёраў, а таксама да кіраўніцтва Бюро і асабіста да Інгіб'ёрг Гісладацір. Мы поўнасцю транспарэнтны ў такім кантэксце, і ўсё гэта можна пераправерыць", - адзначыў прэс-сакратар.

Больш таго, чакаецца, што ў бліжэйшыя дні Нацыянальны сход накіруе запрашэнні ў адрас парламенцкіх структур, такіх як Парламенцкі сход Саюза Беларусі і Расіі, Міжпарламенцкая асамблея СНД, Парламенцкая асамблея АБСЕ і Парламенцкая Асамблея Савета Еўропы.

"Вядома, сітуацыя з распаўсюджваннем каранавіруснай інфекцыі ўнесла свае карэктывы ў многія сферы, у тым ліку ў практыку БДІПЧ па назіранні за выбарамі. Такая сітуацыя склалася ўпершыню. Мы ўважліва аналізавалі вопыт іншых краін-удзельніц, у якіх адбыліся выбары ў апошнія месяцы. У цяперашніх асаблівых умовах у большасці, калі не ва ўсіх выпадках, БДІПЧ разгортвала спецыяльныя наглядальныя місіі, што складаюцца з некалькіх экспертаў, - звярнуў увагу Анатоль Глаз. - Таму, зразумела, і ў нас міжнародным наглядальнікам, як і іншым удзельнікам выбарчага працэсу, неабходна будзе прытрымлівацца пэўных мер эпідэміялагічнай засцярогі, якія былі намі распрацаваны сумесна з Міністэрствам аховы здароўя і ЦВК і адпавядаюць рэкамендацыям СААЗ".

Прадстаўнік МЗС падкрэсліў, што Беларусь была і застаецца адкрытай для міжнароднага назірання і гатова стварыць усе неабходныя ўмовы для эфектыўнай работы замежных наглядальнікаў на маючых адбыцца выбарах.

версія для друку

зрабіць стартавай

дабавіць у выбранае