70-годдзе Вялікай Перамогі
Калекцыя каштоўных кніг ваеннага часу прадстаўлена ў Музеі сучаснай беларускай дзяржаўнасці
7 мая, Мінск /Кар. БЕЛТА/. Калекцыю каштоўных кніг ваеннага часу з фондаў Фундаментальнай бібліятэкі БДУ прадставілі сёння на выстаўцы "Мемарызацыя Вялікай Айчыннай вайны ў беларускім грамадстве: памяць учора і сёння", якая адкрылася ў Музеі сучаснай беларускай дзяржаўнасці, перадае карэспандэнт БЕЛТА.
"Гэта выстаўка з'яўляецца першым вопытам сумеснай работы Музея сучаснай беларускай дзяржаўнасці і Фундаментальнай бібліятэкі Беларускага дзяржаўнага ўніверсітэта. На ёй прадстаўлены каштоўныя кнігі ваенных гадоў. Яны невялікага памеру, якраз каб умясціцца у кішэні гімнасцёркі. Непрыкметныя, на шэрай паперы, у просценькіх вокладках, без ілюстрацый, гэтыя кнігі друкаваліся ў нечалавечых умовах. Аднак яны рэальна дапамагалі людзям не падаць духам і змагацца за Радзіму", - сказала намеснік дырэктара па навукова-метадычнай рабоце Фундаментальнай бібліятэкі БДУ Ала Буціна.
Акрамя таго, у экспазіцыі прадстаўлены сучасныя выданні, прысвечаныя ўвекавечанню памяці Вялікай Айчыннай вайны, медалі і ордэны, памятныя і юбілейныя манеты, паштоўкі, маркі і канверты. Гэтыя экспанаты адбіраліся з фондаў Нацыянальнага гістарычнага музея Беларусі і Музея сучаснай беларускай дзяржаўнасці.
Пачэснымі гасцямі экспазіцыі сталі ветэраны палкоўнік у адстаўцы Мікалай Жураўлёў і ўдзельнік партызанскага руху старшы сяржант Рыгор Махонь. Яны прынялі ўдзел ва ўрачыстым пасвячэнні ў акцябраты школьнікаў з СШ нумар 4, якое адбылося ў час выстаўкі.
версія для друку
зрабіць стартавай
дабавіць у выбранае