II Еўрапейскія гульні ў Беларусі

Марына Літвінчук і Вольга Худзенка перамаглі ў веславанні на байдарцы на 500 м на ІІ Еўрапейскіх гульнях

26 чэрвеня, Мінск /Кар. БЕЛТА/. Беларускі Марына Літвінчук і Вольга Худзенка перамаглі ў веславанні на байдарцы на 500 м на II Еўрапейскіх гульнях, перадае карэспандэнт БЕЛТА.

Беларускі, якія даўно выступаюць разам, з першых метраў дыстанцыі на вяслярным канале ў Заслаўі ўзялі высокі тэмп і выйшлі ў лідары. Першае месца Марына Літвінчук і Вольга Худзенка не ўступілі да самага фінішу, і пачалі святкаваць поспех яшчэ да таго як перасеклі стужку.

Час пераможцаў - 1 мін 40,888 сек. Сярэбранымі прызёрамі Гульняў сталі вопытныя Ганна Караш і Данута Козак з Венгрыі, а бронзавыя медалі заваявалі прадстаўніцы Расіі Кіра Сцяпанава і Настасся Панчанка.

У бягучым сезоне беларускія байдарачніцы Марына Літвінчук і Вольга Худзенка з'яўляюцца аднымі з лідараў сезона, яны перамаглі ў "двойцы" на 500 м на этапе Кубка свету ў Познані.

Лукашэнка павіншаваў Літвінчук і Худзенка з золатам II Еўрапейскіх гульняў

26 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка павіншаваў членаў нацыянальнай каманды па веславанні на байдарках і каноэ Марыну Літвінчук і Вольгу Худзенка з заваяваннем залатога медаля II Еўрапейскіх гульняў у байдарцы-двойцы на 500 м. Аб гэтым БЕЛТА паведамілі ў прэс-службе беларускага лідара.

"Вы паказалі выдатную гатоўнасць і нацэленасць на максімальны вынік. Ні на секунду не дазволілі саперніцам усумніцца ў вашай перавазе", - гаворыцца ў віншаванні.

"Так трымаць!" - даў наказ кіраўнік дзяржавы. Ён пажадаў спартсменкам такіх жа ўпэўненых, яркіх перамог і ў іншых гонках Еўрапейскіх гульняў.

версія для друку

зрабіць стартавай

дабавіць у выбранае