Музей "Дзецям – ахвярам вайны" ў Чырвоным Беразе

Музей, які адкрыўся ў снежні 2024 года, стаў прадаўжэннем мемарыяла "Дзецям – ахвярам Вялікай Айчыннай вайны", які быў створаны ў вёсцы Чырвоны Бераг Жлобінскага раёна ў 2007-м. Ён прысвечаны трагічным падзеям гісторыі Вялікай Айчыннай вайны і фашысцкай акупацыі, калі звыш 260 канцлагераў сталі крывавымі фабрыкамі генацыду беларускага народа. У Чырвоным Беразе нацысты стварылі зборны пункт для дзяцей, якія сілай адбіралі ў бацькоў і рабілі донарамі для нямецкіх салдат і афіцэраў, а таксама адпраўлялі на работы ў Германію. Гэтае месца таксама называюць "Дзіцячай Хатынню". Унікальны помнік смутку – мемарыяльны комплекс "Дзецям – ахвярам вайны" – не мае аналагаў не толькі ў Беларусі, але і ў краінах замежжа. Тут усё прасякнута святлом надзеі, але стрымаць слёзы немагчыма. У 2024 годзе ў мемарыяльным комплексе ўзвялі будынак музея, дзе створана ўражальная экспазіцыя. Мемарыял у Чырвоным Беразе стаў праектам творчай групы пад кіраўніцтвам знакамітага беларускага архітэктара Леаніда Левіна, які ствараў і мемарыяльны комплекс у Хатыні. Яму ў новым музеі прысвечаны асобны памятны пакой. Побач з уваходам абсталявана выставачная зала, дзе размешчаны работы сучасных школьнікаў, прысвечаныя тэме дзяцей на вайне. Асноўная частка экспазіцыі расказвае пра лёсы хлопчыкаў і дзяўчынак з усёй постсавецкай прасторы, пра іх жыццё ў даваенны час і гады Вялікай Айчыннай вайны.