Прамовы і інтэрв’ю
Скварцоў: Беларусь і Ізраіль за 25 гадоў прайшлі вялікі шлях насустрач адзін аднаму
6 чэрвеня, Мінск /Марта Астрэйка - БЕЛТА/.
Беларусь і Ізраіль за чвэрць стагоддзя прайшлі вялікі шлях насустрач адзін аднаму. Гэты факт адзначыў Надзвычайны і Паўнамоцны Пасол Беларусі ў Ізраілі Уладзімір Скварцоў на ўрачыстым вечары ў Ашдодзе, паведамілі карэспандэнту БЕЛТА ў беларускай дыпмісіі.На мерапрыемстве ў канцэртнай зале "Дзюна", прымеркаваным да 25-годдзя ўстанаўлення дыпламатычных адносін паміж Беларуссю і Ізраілем, прысутнічалі віцэ-мэр Ашдода Барыс Гітэрман, прадстаўнікі ізраільскіх органаў дзяржкіравання, пасольстваў краін СНД, беларускага зямляцтва, СМІ і мясцовай грамадскасці.
Паводле слоў Уладзіміра Скварцова, аб актуальным стане дружалюбных партнёрскіх адносін і тым значэнні, якое надаецца бакамі далейшаму нарошчванню супрацоўніцтва, сведчыць факт абмену віншавальнымі пасланнямі з нагоды юбілею на ўзроўні кіраўнікоў дзяржаў.
Кіраўнік дыпмісіі асабліва вылучыў тое, што цяперашнія цёплыя адносіны паміж двума народамі грунтуюцца на шматвяковай гісторыі сумеснага добрасуседскага пражывання беларусаў і яўрэяў на беларускай зямлі.
"Многія выдатныя прадстаўнікі эліты яўрэйскай дзяржавы - ураджэнцы Беларусі. Сярод іх - палітыкі, вучоныя, творчыя дзеячы, лаўрэаты Нобелеўскай прэміі. Беларуская зямля, як вядома, дала Ізраілю трох прэзідэнтаў і трох прэм'ер-міністраў, - падкрэсліў Уладзімір Скварцоў. - Мы ўдзячны землякам - прадстаўнікам розных пакаленняў за тое, што яны не страцілі сувязь са сваёй этнічнай радзімай, захаваўшы добрае і шчырае стаўленне да яе. Яны - важнае гуманітарнае звяно ў нашым двухбаковым дыялогу".
Міністр аліі і інтэграцыі Ізраіля, сустаршыня сумеснага беларуска-ізраільскага камітэта па гандлёвым і эканамічным супрацоўніцтве Софа Ландвер падкрэсліла высокі ўзровень адносін, дасягнуты паміж дзвюма краінамі, згадаўшы яркія і паспяховыя вынікі сумесных намаганняў апошніх гадоў, уключаючы адмену візавага рэжыму. Гэты крок пазітыўна ўплывае на інтэнсіўнасць узаемных паездак грамадзян, дадала яна.
Ізраільскі міністр выказала словы ўдзячнасці ў адрас кіраўніка беларускай дзяржавы Аляксандра Лукашэнкі за тую работу, якая праводзіцца ў Беларусі па ўвекавечванні памяці ахвяр фашызму.
Пасля афіцыйнай часткі для шматлікіх гасцей юбілейнага вечара быў дадзены святочны канцэрт "Мы з Беларусі" з удзелам заслужанага артыста БССР Леаніда Барткевіча, саліста легендарнага ансамбля "Песняры", а таксама ізраільскіх выканаўцаў.
версія для друку
зрабіць стартавай
дабавіць у выбранае
