25 лістапада, Мінск /Кар. БЕЛТА/. Еўрапейскі юнацкі алімпійскі фестываль арганізуюць у Мінску на самым высокім узроўні. Аб гэтым заявіў у эфіры тэлепраграмы "Актуальнае інтэрв'ю" на тэлеканале "Беларусь 1" старшыня Мінгарвыканкама Андрэй Шорац, паведамляе БЕЛТА.
"У нас ёсць вопыт правядзення маштабных спартыўных спаборніцтваў, у горадзе існуе адпаведная база, таму Еўрапейскі юнацкі алімпійскі фестываль будзе арганізаваны на самым высокім узроўні", - сказаў Андрэй Шорац.
Мінск атрымаў права прыняць летні Еўрапейскі юнацкі алімпійскі фестываль (ЕЮАФ) 2019 года. Заяўка беларускай сталіцы 22 лістапада была падтрымана на Генеральнай асамблеі Еўрапейскіх алімпійскіх камітэтаў, якая прайшла ў Баку (Азербайджан).
Летні Еўрапейскі юнацкі алімпійскі фестываль праводзіцца ў няцотныя гады і з'яўляецца комплексным спартыўным мерапрыемствам, праграма якога ўключае спаборніцтвы па дзевяці відах спорту, сярод якіх баскетбол, веласпорт, валейбол, гандбол, дзюдо, лёгкая атлетыка, плаванне, спартыўная гімнастыка, тэніс. Як правіла, у турніры прымаюць удзел юнакі і дзяўчаты ва ўзросце ад 14 да 18 гадоў. Пры гэтым краіна-арганізатар атрымлівае права ўдзелу ў спаборніцтвах па ўсіх відах спорту поўным складам без праходжання адбору на папярэднім этапе. Пры правядзенні ЕЮАФ згодна з афіцыйным пратаколам павінны быць выкананы ўсе працэдуры Міжнароднага алімпійскага камітэта: эстафета і запальванне алімпійскага агню, парад нацый і цырымонія адкрыцця, клятва спартсменаў і спартыўных суддзяў, падняцце алімпійскага флага.
Пн | Аўт | Сер | Чцв | Пт | Сб | Нядз |
---|