Прамовы і інтэрв’ю
Руды: Якасны рост ВУП цяпер важнейшы за колькасны
11 лістапада, Мінск /Аліна Грышкевіч - БЕЛТА/. У цяперашніх умовах больш важны не колькасны, а якасны рост ВУП, узровень жыцця чалавека, эфектыўнае выкарыстанне грошай. Гэта адзначыў памочнік Прэзідэнта Беларусі Кірыл Руды ў час даклада ўрада, Нацыянальнага банка, аблвыканкамаў і Мінскага гарвыканкама Прэзідэнту Беларусі Аляксандру Лукашэнку аб рабоце эканомікі за мінулы перыяд 2014 года, ацэнцы вынікаў года і праектах прагнозу, бюджэту і грашова-крэдытнай палітыкі на 2015 год, перадае карэспандэнт БЕЛТА.
Кірыл Руды, які з'яўляецца старшынёй міжведамаснай камісіі па бяспецы ў эканамічнай сферы пры Савеце бяспекі, даў ацэнку прагнознага сцэнарыя развіцця краіны ў 2015 годзе, прадстаўленага ўрадам і Нацбанкам.
Памочнік Прэзідэнта назваў закладзены на будучы год прагноз цэн на сыравінныя прадукты аптымістычным.
Ён таксама звярнуў асаблівую ўвагу на пытанні інфляцыі і кошту крэдытаў. "Кошт крэдытаў перавышае рэнтабельнасць прадпрыемстваў у тры разы. Даўгі прамыслоўцаў у пяць разоў перавышаюць аб'ём вытворчасці. У выніку расце колькасць стратных прадпрыемстваў, і справа тут не столькі ў курсавой розніцы. Напрыклад, страты "Бабруйскаграмаша" за 9 месяцаў склалі Br41 млрд, а на абслугоўванне крэдытаў пайшло Br68 млрд", - адзначыў памочнік Прэзідэнта.
На яго думку, каб крэдыты сталі даступнымі, стаўка павінна быць не вышэйшая за рэнтабельнасць. "Для прамысловасці гэта максімум 10 працэнтаў, значыць, інфляцыя павінна быць не большая за 9 працэнтаў. І гэта не ліберальная прапанова. Хутчэй, прапануецца ўвядзенне грашовай дыктатуры. Прапануецца зрабіць прыярытэтам на бліжэйшыя два гады зніжэнне інфляцыі да сярэднегадавога значэння 9 працэнтаў, а ў далейшым старацца яшчэ больш яго зніжаць. Гэта цалкам рэальна", - лічыць Кірыл Руды. Ён адзначыў, што для гэтага трэба кіраваць грашовай масай і, магчыма, перагледзець у бок скарачэння шэраг дзяржпраграм.
Памочнік Прэзідэнта прапанаваў эканоміць на праектах з доўгім тэрмінам акупнасці. Магчыма, перанесці тэрміны пачатку будаўніцтва новых аб'ектаў, скараціць аб'ём будаўніцтва жылля з дзяржпадтрымкай. "Акрамя таго, трэба ўплываць і на свабодныя, што не значыць нерэгулюемыя, цэны, процідзейнічаць цэнаваму згавору, манаполіі, абараняць канкурэнцыю", - падкрэсліў Кірыл Руды.
"Пры гэтым важна ўлічваць уплыў дэвальвацыі на інфляцыю, - адзначыў памочнік Прэзідэнта. - У нас кожны працэнт дэвальвацыі дае паўпрацэнта ў росце цэн. У рэзкай дэвальвацыі неабходнасці няма. У нас асноўны экспарт (41 працэнт) - гэта нафтапрадукты і калій, і іх цэны не залежаць ад курса беларускага рубля. А станоўчы эфект ад дэвальвацыі на несыравінны экспарт нівеліруецца падаражэннем імпартных камплектуючых. Таму сумніўна неабходнасць дэвальвацыі для ўсёй эканомікі, а не толькі для асобных прадпрыемстваў".
Кірыл Руды прапанаваў разгледзець магчымасць распрацоўкі ў краіне двухгадовай праграмы зніжэння інфляцыі да сярэднегадавых 9 працэнтаў з жорсткім кантролем выканання на аснове штоквартальнага аналізу.
На нарадзе гучалі розныя пункты гледжання адносна прагнозаў далейшага развіцця краіны, якія былі дэталёва абмеркаваны.
версія для друку
зрабіць стартавай
дабавіць у выбранае| Пн | Аўт | Сер | Чцв | Пт | Сб | Нядз |
|---|---|---|---|---|---|---|
