23 кастрычніка, Мінск /Аліна Грышкевіч - БЕЛТА/. Цікавасць славенскіх бізнесменаў да беларускага рынку вялікая. Упэўненасць у гэтым выказаў генеральны дырэктар дырэктарата па эканамічнай дыпламатыі Міністэрства замежных спраў Славеніі Станіслаў Рашчан па выніках праведзенага ў Любляне чацвёртага пасяджэння беларуска-славенскай міжурадавай камісіі па гандлёва-эканамічным і навукова-тэхнічным супрацоўніцтве, паведамляе карэспандэнт БЕЛТА.
Станіслаў Рашчан пазітыўна ацаніў работу камісіі, а таксама праведзенага напярэдадні яе пасяджэння беларуска-славенскага бізнес-форуму. Станіслаў Рашчан выказаў упэўненасць, што гэтыя мерапрыемствы дадуць магчымасць умацаваць існуючыя беларуска-славенскія сувязі, а таксама павялічыць двухбаковы тавараабарот. Акрамя таго, ён разлічвае на стварэнне новых беларуска-славенскіх сумесных прадпрыемстваў.
У ліку перспектыўных напрамкаў супрацоўніцтва Славеніі і Беларусі Станіслаў Рашчан назваў інжынірынг, аўтаіндустрыю, хімічную прамысловасць, харчовую індустрыю і турызм.
"Патэнцыял беларускага рынку застаецца ўсё яшчэ нявыкарыстаным для работы славенскіх бізнесменаў, і мы ўзаемна прыкладаем усе намаганні, каб Беларусь і Славенія інтэнсіфікавалі ўзаемавыгаднае супрацоўніцтва", - адзначыў генеральны дырэктар дырэктарата па эканамічнай дыпламатыі.
На пленарным пасяджэнні міжурадавай беларуска-славенскай камісіі па гандлёва-эканамічным і навукова-тэхнічным супрацоўніцтве намеснік міністра замежных спраў Алена Купчына старшынствавала з боку Беларусі. Старшынёй славенскай часткі быў Станіслаў Рашчан. На мерапрыемстве разгледжаны стан і перспектывы развіцця беларуска-славенскага гандлёва-эканамічнага ўзаемадзеяння, у тым ліку ў галінах прамысловасці, транспарту, сельскай гаспадаркі і турызму. Размова ішла таксама аб удасканаленні дагаворна-прававой базы. Узгоднены канкрэтныя прапановы па пашырэнні сувязей у эканамічнай сферы, рэалізацыі новых сумесных праектаў.
У час візіту Алены Купчыной у Славенію прайшлі яе перагаворы з дзяржаўным сакратаром Міністэрства замежных спраў Славеніі, адбыліся сустрэчы з прадстаўнікамі дзелавых колаў. Бакі абмеркавалі існуючыя і запланаваныя сумесныя інвестыцыйныя праекты, праграму аздараўлення беларускіх дзяцей у Славеніі, культурнае супрацоўніцтва, пытанні ўзаемадзеяння па лініі Беларусь - ЕС.
Пн | Аўт | Сер | Чцв | Пт | Сб | Нядз |
---|