Прамовы і інтэрв’ю

23 кастрычніка, Мінск /Кар. БЕЛТА/. Энергасістэма Беларусі пачала рух да стварэння аптовага рынку электраэнергіі. Аб гэтым сёння ў час анлайн-канферэнцыі на сайце БЕЛТА паведаміў намеснік міністра энергетыкі Беларусі Міхаіл Міхадзюк.

"Сёння энергасістэма хоць і з'яўляецца шматфункцыянальнай структурай, але разам з тым яна тэхналагічна складаная, таму, займаючыся ўдасканаленнем яе структуры кіравання, мы пастараліся не нашкодзіць. Падыходы, якія сёння закладвалі, - гэта ў першую чаргу падзел энергавытворчасці па відах дзейнасці: вытворчасць і перадача, аднаўленне і збыт электрычнай і цеплавой энергіі", - адзначыў намеснік міністра.

На яго думку, гэтыя меры дадуць магчымасць забяспечыць у краіне празрыстасць затрат па відах дзейнасці і канкурэнтнасць, таму што канчатковая мэта гэтай рэфармацыі - стварэнне аптовага рынку. "І гэта звязана не толькі з патрэбнасцю ўнутры краіны, гэта зніжэнне затрат па тых міжнародных абавязацельствах, якія ўзяла на сябе Беларусь, прымаючы ўдзел у стварэнні агульнага рынку", - растлумачыў ён.

Таксама разглядаецца перадача ў непасрэднае падпарадкаванне "Белэнерга" 12 электрычных станцый высокага ціску. Гэта будзе садзейнічаць цэнтралізацыі фінансаў на развіццё гэтых аб'ектаў, павышэнню эфектыўнасці выкарыстання гэтых фінансаў шляхам вызначэння прыярытэтных напрамкаў развіцця кожнай станцыі, лічыць намеснік міністра. "Другім этапам разглядаем стварэнне перадаючай кампаніі, гэта будзе дзяржаўная кампанія. Гэта агульнасусветная практыка для празрыстасці затрат на перадачу электрычнай энергіі. Такія ж працэсы праходзяць у краінах СНД, многія ўжо апярэджваюць нас у гэтым плане. Гэта неабходна ў сувязі з запланаваным у канцы гэтага ўсяго працэсу аптовага рынку электрычнай энергіі", - паведаміў Міхаіл Міхадзюк.

Усе гэтыя пераўтварэнні, на яго думку, таксама будуць садзейнічаць стварэнню больш спрыяльных умоў для прыцягнення знешніх прамых інвестыцый у айчынную энергетыку і дыверсіфікацыі паставак энергіі і энергарэсурсаў у Беларусь.

"Таксама адным з пунктаў у нашых планах з'яўляецца рэструктурызацыя органаў сістэмы энерганагляду. Сёння энерганагляд ажыццяўляе нагляд не толькі за работай энергасістэмы, а ў першую чаргу за тэхнічнай эксплуатацыяй электраўстановак у спажыўцоў. Ён знаходзіцца ў падпарадкаванні абласных энергасістэм, а мы лічым, што трэба стварыць асобную незалежную структуру ў складзе Мінэнерга. Гэта павысіць якасць работы гэтай структуры", - растлумачыў Міхаіл Міхадзюк.

Намеснік міністра адзначыў, што гэта карэнныя пераўтварэнні, асноўная задача якіх - забяспечыць надзейнасць работы беларускай энергасістэмы і яе кіруемасць, паколькі гэта адна з ключавых галін народнай гаспадаркі.