15 лістапада, Мінск /Эдуард Півавар - БЕЛТА/. Мінскіх тавараў у Маскве будзе больш. Такое абяцанне даў масквічам старшыня Мінгарвыканкама Мікалай Ладуцька, адкрываючы сёння ў рамках Дзён Мінска ў Маскве выстаўку-кірмаш прадукцыі мінскіх прадпрыемстваў, якая разгарнулася каля галоўнага ўваходу ва Усерасійскі выставачны цэнтр, перадае карэспандэнт БЕЛТА.
"Мы выпускаем прадукцыю па даступных цэнах і добрай якасці, - запэўніў Мікалай Ладуцька. - Нашых тавараў у Маскве павінна быць больш і іх будзе больш". Начальнік упраўлення інтэграцыйнага ўзаемадзеяння ўрада Масквы Сяргей Шмакаў, які прыняў удзел у цырымоніі, адзначыў, што беларускія кірмашы сталі ў расійскай сталіцы прывычнай з'явай. Толькі ў мінулым годзе праведзена 314 беларускіх кірмашоў, на якіх прададзена тавараў на $18 млн. "Гэтыя кірмашы запатрабаваны, масквічы галасуюць рублём за беларускую прадукцыю", - сказаў Сяргей Шмакаў.
Выстаўка-кірмаш тавараў у рамках Дзён Мінска ў Маскве разгорнута не толькі ва Усерасійскім выставачным цэнтры, але і на поўдні расійскай сталіцы. Масквічам прапануюцца традыцыйныя мясныя, малочныя, рыбныя прадукты і кандытарскія вырабы, а таксама прадукцыя лёгкай прамысловасці і народнай творчасці. Праводзіцца таксама дэгустацыя страў нацыянальнай кухні. На адкрытых пляцоўках дэманструюцца ўзоры дарожнай і будаўнічай тэхнікі прамысловых прадпрыемстваў Мінска.
Пн | Аўт | Сер | Чцв | Пт | Сб | Нядз |
---|