Прамовы і інтэрв’ю

"Адкрытае, давернае, канструктыўнае ўзаемадзеянне, да якога мы імкнёмся ў адносінах з Германіяй, прадугледжвае адсутнасць закрытых тэм для абмеркавання, гатоўнасць да ўзаемнага пошуку прымальных рашэнняў па любых праблемных момантах", - адзначыў Уладзімір Макей.

Паводле яго слоў, калі бакі будуць бачыць праблемы, то задача не замоўчваць іх, а спрабаваць вырашыць, абмяркоўваючы ў адкрытай і шчырай атмасферы. "Бізнес зацікаўлены ў тым, каб пастаянна развівацца, атрымліваць дывідэнды ад узаемнага супрацоўніцтва. Таму ён больш чым хтосьці іншы зацікаўлены ва ўстараненні перашкод", - падкрэсліў міністр.

Уладзімір Макей канстатаваў, што Германія застаецца для Беларусі самым важным эканамічным партнёрам у Еўропе, стабільна ўваходзіць у пяцёрку вядучых гандлёвых партнёраў. "Больш за 300 сумесных прадпрыемстваў знайшлі свае нішы і паспяхова працуюць у нашай краіне на працягу ўжо многіх гадоў. Але відавочна, што патэнцыял значна вышэйшы за цяперашні ўзровень", - сказаў ён.

Міністр падкрэсліў важнасць аднаўлення дзейнасці савета. "Мы лічым, што гэты савет павінен і можа адыграць значную ролю ў эканамічным развіцці нашай краіны і ўмацаванні палітычнай незалежнасці і суверэнітэту", - адзначыў ён.

Паводле слоў Уладзіміра Макея, супрацоўніцтва з Германіяй апошнім часам развіваецца вельмі інтэнсіўна і апіраецца на шэраг правераных часам інстытуцыянальных механізмаў. Аднак няўрадавы савет дзелавога супрацоўніцтва - гэта не проста орган, прызначаны дапоўніць існуючы інструментарый беларуска-германскага ўзаемадзеяння. "Мы чакаем ад яго якасна новых, крэатыўных, але пры гэтым ад жыцця, ад практыкі прапаноў, ідэй, якія маглі б быць накіраваны на ўмацаванне эканомікі нашай краіны", - заявіў міністр. Таксама савет можа пасадзейнічаць павышэнню інфармавання германскай бізнес-супольнасці - як буйных канцэрнаў, так і сярэдніх, малых прадпрыемстваў - аб інвестыцыйным клімаце Беларусі, умовах вядзення бізнесу ў краіне, дзеючых прэферэнцыйных рэжымах, перспектыўных галінах.

"Мы лічым, што савет павінен садзейнічаць устанаўленню прамых кантактаў паміж беларускімі і германскімі кампаніямі з далейшым выхадам на рэалізацыю сумесных узаемавыгадных праектаў. Гэта не толькі мае чаканні як міністра замежных спраў. Работа дзелавога савета будзе і ў далейшым знаходзіцца ў цэнтры ўвагі кіраўніцтва Беларусі і персанальна Прэзідэнта, які ў свой час выступіў з ініцыятывай яго стварэння", - рэзюмаваў Уладзімір Макей.