30 мая, Мінск /Таццяна Паляжай - БЕЛТА/. Прэзідэнт Беларусі Аляксандр Лукашэнка заклікае ніколі не спяшацца, прымаючы рашэнні аб выхадзе з СНД. Аб гэтым ён заявіў сёння на сустрэчы з кіраўнікамі дэлегацый, якія ўдзельнічаюць у пасяджэнні Савета кіраўнікоў урадаў СНД у Мінску, перадае карэспандэнт БЕЛТА.
"Я заўсёды кажу: навошта рушыць тое, што ёсць", - адзначыў Аляксандр Лукашэнка. На яго думку, СНД з'яўляецца добрай перагаворнай пляцоўкай, на якой можна абмяркоўваць пытанні, у тым ліку і ў двухбаковым парадку, і ў прыватным. Кіраўнік беларускай дзяржавы лічыць, што рабіць паспешлівыя крокі па выхадзе з Садружнасці не трэба.
Аляксандр Лукашэнка сказаў, што і ва ўкраінскага боку "ёсць разуменне, што калі штосьці і трэба зрабіць у гэтым плане, то спяшацца дакладна не трэба". "Таму што, зрабіўшы пэўны крок, вярнуцца значна больш складана. І твар захаваць, і яшчэ нейкія праблемы ўзнікнуць... Таму я вас проста агітую: ніколі не спяшайцеся пакінуць гэту нармальную пляцоўку ўзаемадзеяння", - падкрэсліў Прэзідэнт Беларусі.
"Размаўляем жа на адной мове, думаем прыкладна аднолькава. Нікуды не дзенеш гэтыя гады, дзесяцігоддзі, пражытыя разам. І дзякуй богу, што ў нас ёсць такі вопыт. У кожнай з дзяржавы, яе кіраўніцтва ёсць свае асаблівасці, свае інтарэсы, але для гэтага і існуюць адпаведныя арганізацыі, форумы, на якіх трэба ўтрасаць пытанні, прымаць рашэнні і дабівацца сваіх інтарэсаў", - адзначыў беларускі лідар.
Пн | Аўт | Сер | Чцв | Пт | Сб | Нядз |
---|