Прамовы і інтэрв’ю

29 красавіка, Мінск /Кар. БЕЛТА/. У дагаворы аб Еўразійскім эканамічным саюзе павінна быць больш эканомікі, чым палітыкі. Аб гэтым сёння Прэзідэнт Беларусі Аляксандр Лукашэнка заявіў у час сустрэчы са старшынёй Калегіі Еўразійскай эканамічнай камісіі Віктарам Хрысценкам, перадае карэспандэнт БЕЛТА.

Да гэтай сустрэчы кіраўнік дзяржавы абмеркаваў праект дагавора аб Еўразійскім эканамічным саюзе з членам Савета Еўразійскай эканамічнай камісіі ад Беларусі Сяргеем Румасам. У Віктара Хрысценкі Прэзідэнт пацікавіўся, як ідзе работа па дагаворы. "Я хацеў бы ад вас як ад галоўнай дзеючай асобы па арганізацыі гэтай усёй работы пачуць, як ідзе работа па гэтым дагаворы, - сказаў Аляксандр Лукашэнка. - Як мы рухаемся, істотна ці няма ніякіх зрухаў. Чаго тут больш - палітыкі, эканомікі. Хацелася б, каб другога. Усё ж такі без палітыкі нікуды, але тым не менш гэта эканамічны саюз, таму, калі ёсць прэтэнзіі да беларускага боку, я хацеў бы, каб вы сапраўды вельмі шчыра, як гэта заўсёды ў нас бывае, сказалі. У нас ёсць час выправіцца. Я не думаю, што мы вельмі адстаём ці тармозім гэтыя працэсы".

Паводле слоў Віктара Хрысценкі, работа над дагаворам ідзе ў звышінтэнсіўным бесперапынным рэжыме. Задзейнічаны сотні экспертаў з трох урадаў, з камісіі. "Трэба сказаць, што дакумент атрымліваецца. Атрымліваецца комплексны, як і хацелі, які ахоплівае ўсе пытанні дзейнасці Еўразійскага эканамічнага саюза. Менавіта як эканамічнага саюза, эканамічнай інтэграцыі", - адзначыў ён.

Віктар Хрысценка падкрэсліў, што значнасць многіх эканамічных пытанняў вельмі высокая, і сёння на пасяджэнні Вышэйшага Еўразійскага эканамічнага савета будуць абмяркоўвацца пытанні, якія без кіраўнікоў дзяржаў абмяркоўваць проста немагчыма. "Сам па сабе вышэйшы дзяржаўны ўзровень азначае не проста складанасць перагаворнага працэсу, а значнасць і вельмі глыбокую перспектыву па многіх пытаннях. Напрыклад, па фарміраванні агульнага рынку нафты, нафтапрадуктаў, газу. Гэта прынцыпова новыя канструкты, якіх не было на сённяшні дзень і якія адсутнічалі і існавалі як выключэнні", - сказаў старшыня Калегіі Еўразійскай эканамічнай камісіі.