Прамовы і інтэрв’ю
Лукашэнка: Беларускі фонд міру і ў далейшым будзе садзейнічаць выпрацоўцы дыпламатычных кампрамісаў
13 мая, Мінск /Кар. БЕЛТА/. Беларускі фонд міру і ў далейшым будзе садзейнічаць выпрацоўцы дыпламатычных кампрамісаў. Аб гэтым гаворыцца ў прывітанні, якое Прэзідэнт Аляксандр Лукашэнка накіраваў удзельнікам урачыстага сходу, прысвечанага 55-й гадавіне ўтварэння Беларускага фонду міру. Аб гэтым БЕЛТА паведамілі ў прэс-службе беларускага лідара.
Прэзідэнт павіншаваў удзельнікаў сходу са знамянальнай датай. За гады сваёй дзейнасці Беларускі фонд міру набыў заслужаны аўтарытэт як унутры краіны, так і за мяжой, наладжваючы канструктыўны дыялог паміж народамі на аснове гуманізму і імкнення да ўсеагульнага ўзаемаразумення, гаворыцца ў прывітанні.
"Сёння Беларускі фонд міру беражліва захоўвае і ўмацоўвае традыцыі мінулых гадоў, аб'ядноўваючы ў сваіх радах больш за 12 тыс. чалавек. Арганізацыя здольна эфектыўна змагацца за інтарэсы міру ў няпростай сучаснай рэальнасці, быць верным саратнікам дзяржавы ў вырашэнні сацыяльных і эканамічных праблем", - адзначыў Аляксандр Лукашэнка.
Кіраўнік дзяржавы падкрэсліў, што найвышэйшая каштоўнасць Беларусі - мір у дамах яе грамадзян. Прэзідэнт выказаў упэўненасць, што Беларускі фонд міру і ў далейшым будзе верна служыць на карысць Айчыны, а таксама садзейнічаць у рэалізацыі міратворчых ініцыятыў і выпрацоўцы дыпламатычных кампрамісаў у імя дабрабыту і спакою на планеце.
Аляксандр Лукашэнка пажадаў здароўя, новых дасягненняў і шчасця ўсім, хто прымаў і прымае актыўны ўдзел у дзейнасці Беларускага фонду міру.
версія для друку
зрабіць стартавай
дабавіць у выбранае
