9 верасня, Кішынёў /Андрэй Гусін - БЕЛТА/. Беларусь з'яўляецца для Малдовы важным гандлёвым партнёрам. Аб гэтым заявіў прэм'ер-міністр Малдовы Юрый Лянкэ, выступаючы па малдаўскім тэлебачанні, перадае карэспандэнт БЕЛТА.
Кіраўнік урада выказаў удзячнасць уладам Беларусі за павелічэнне закупак у Малдовы свежай і кансерваванай плодаагародніннай прадукцыі ва ўмовах, калі Расія забараніла іх пастаўкі на расійскі рынак.
Юрый Лянкэ падкрэсліў, што Малдова зацікаўлена ў пашырэнні гандлёва-эканамічнага супрацоўніцтва з Беларуссю. На гэты момант Беларусь займае першае месца па аб'ёме закупак малдаўскай вінаробнай прадукцыі і другое - па закупках плодаагародніннай прадукцыі.
Прэзідэнт Малдовы Мікалай Цімофці ў час нядаўняй сустрэчы ў Анкары з прэм'ер-міністрам Беларусі Міхаілам Мясніковічам сказаў, што Малдова ўдзячна беларускім уладам за іх пазіцыю па захаванні і пашырэнні двухбаковага гандлю. Міхаіл Мясніковіч адзначыў, што Беларусь не мае намеру змяняць рэжым гандлю з Малдовай, а патэнцыял малдаўска-беларускага супрацоўніцтва дае магчымасць яго актывізаваць. Акрамя таго, ён выказаўся за стварэнне сумесных прадпрыемстваў, якія працавалі б на карысць абодвух бакоў.
Пн | Аўт | Сер | Чцв | Пт | Сб | Нядз |
---|