Прамовы і інтэрв’ю

24 верасня, Кішынёў /Андрэй Гусін - БЕЛТА/. Беларусь можа стаць добрым прыкладам для іншых краін па выкарыстанні прадастаўляемых Малдовай магчымасцей прасоўвання сумесна вырабленай прадукцыі на рынкі трэціх краін. Аб гэтым заявіў прэзідэнт Гандлёва-прамысловай палаты Малдовы, экс-міністр эканомікі Валерый Лазэр, выступаючы на беларуска-малдаўскім бізнес-форуме ў Кішынёве, перадае карэспандэнт БЕЛТА.

Падпісанае Малдовай пагадненне аб свабодным гандлі з Еўрапейскім саюзам адкрывае доступ для бяспошлінных паставак прадукцыі на рынак ЕС. Акрамя таго, пагадненне аб свабодным гандлі падпісана Малдовай і з Турцыяй. Валерый Лазэр адзначыў, што ў выніку Малдова знаходзіцца ўжо ў новых геаэканамічных рэаліях і адкрываюцца новыя магчымасці для гандлю як для самой рэспублікі, так і яе партнёраў.

Ён сказаў, што Малдова хоча выкарыстаць гэтыя магчымасці і рэалізаваць іх разам са сваімі традыцыйнымі і новымі партнёрамі. Прэзідэнт ГПП падкрэсліў, што Беларусь з'яўляецца адным з галоўных гандлёва-эканамічных партнёраў Малдовы. Паміж краінамі створана добрая база для пераходу супрацоўніцтва на новы ўзровень. У прыватнасці, больш актыўнае развіццё вытворчай прамысловай кааперацыі паміж Мінскам і Кішынёвам дасць магчымасць Беларусі прадаваць вырабленую сумесна прадукцыю на рынках краін ЕС, а Малдове - у адваротным напрамку - у краінах Мытнага саюза. Валерый Лазэр выказаўся за рэалізацыю большай колькасці новых амбіцыйных праектаў паміж дзвюма краінамі.