Прамовы і інтэрв’ю

9 ліпеня, Александрыя /Сяргей Кулягін - БЕЛТА/. Свята "Купалле" ў аграгарадку Александрыя стала нацыянальным здабыткам Беларусі. Аб гэтым заявіла 9 ліпеня на ўрачыстым адкрыцці мерапрыемства намеснік прэм'ер-міністра Наталля Качанава, перадае карэспандэнт БЕЛТА.

"Чарговы раз гасцінная Александрыйская зямля прымае цудоўнае, знакавае, яркае свята "Купалле", якое стала ўжо нацыянальным здабыткам Беларусі. Сёння тут, на маляўнічым беразе Дняпра, сустракаюцца людзі розных пакаленняў, розных нацыянальнасцей з розных краін, і ў кожнага ёсць унікальная магчымасць падзяліцца сваім творчым, прафесійным вопытам, дакрануцца да вытокаў культуры, - сказала віцэ-прэм'ер. - Гэта свята садзейнічае аб'яднанню нашых славянскіх народаў. Дзякуючы дзяржаўнай палітыцы, праводзімай у краіне, пад кіраўніцтвам Аляксандра Рыгоравіча Лукашэнкі, адно з самых старажытных свят Купалле стала нацыянальным культурным сімвалам, які накіраваны на развіццё і захаванне нашых традыцый, нашых культур".

На думку Наталлі Качанавай, вельмі важна, каб гэтыя традыцыі перадаваліся маладому пакаленню. "Паколькі толькі захоўваючы культуру, захоўваючы нашы традыцыі, мы можам з упэўненасцю глядзець у будучыню", - падкрэсліла яна.

Ад імя арганізацыйнага камітэта Наталля Качанава выказала словы ўдзячнасці ўсім, хто прыехаў на свята, прымаў удзел у яго арганізацыі. Яна шчыра павіншавала ўсіх з гэтай знамянальнай падзеяй, пажадала міру, дабрабыту, шчасця і аб'явіла свята адкрытым.