10 ліпеня, Мінск /Таццяна Грыгаровіч - БЕЛТА/. Самыя камфортныя ўмовы для кітайскага бізнесу створаны ў Беларусі. Такое меркаванне на сустрэчы з намеснікам прэм'ер-міністра Беларусі Анатолем Тозікам выказала старшыня Камітэта па замежных справах Усекітайскага сходу народных прадстаўнікоў Кітайскай Народнай Рэспублікі Фу Ін, паведамілі БЕЛТА ў прэс-службе беларускага ўрада.
Фу Ін высока ацаніла развіццё беларуска-кітайскіх адносін і ўзровень увагі і падтрымкі, якія аказваюцца з боку беларускага ўрада кітайскім кампаніям пры рэалізацыі праектаў у Беларусі. "Няма такой іншай краіны, як Беларусь, дзе былі б створаны такія камфортныя ўмовы для кітайскага бізнесу або такое моцнае прасоўванне сумесных праектаў з боку ўрада", - адзначыла Фу Ін. Яна выказала ўпэўненасць, што беларускія і кітайскія кампаніі сумеснымі намаганнямі змогуць адкрыць новы этап свайго развіцця. Для гэтага ёсць два фактары: фарміраванне АЭП і рэалізацыя праекта па стварэнні эканамічнай зоны Шаўковага шляху, дзе Беларусь - ключавое звяно. Як падкрэсліла Фу Ін, галоўнымі перавагамі Беларусі для кітайскіх партнёраў з'яўляюцца ўнутраная палітычная стабільнасць і ўстойлівасць.
У ходзе сустрэчы бакі абмяняліся інфармацыяй аб рэалізацыі праектаў гандлёва-эканамічнага і крэдытна-інвестыцыйнага супрацоўніцтва, прапановамі па іх актывізацыі, а таксама абмеркавалі некаторыя праблемныя пытанні. "Удзельнікі сустрэчы прыйшлі да адзінага меркавання, што на сучасным этапе развіцця адносін неабходна ўзмацніць ролю прамых інвестыцый, задзейнічаць рыначныя механізмы размеркавання рэсурсаў, а таксама аказваць пастаянную ўвагу і падтрымку сумеснай рэалізацыі буйных стратэгічных праектаў", - адзначылі ў прэс-службе.
Пн | Аўт | Сер | Чцв | Пт | Сб | Нядз |
---|