25 лютага, Парыж /Аліна Грышкевіч - БЕЛТА/. Прэзідэнт Францыі Франсуа Аланд падтрымлівае неабходнасць актывізацыі эканамічных адносін з Беларуссю. За такі падыход ён выказаўся 22 лютага ў гутарцы з Надзвычайным і Паўнамоцным Паслом Беларусі ў Францыі Паўлам Латушкам пасля цырымоніі ўручэння даверчых грамат, паведамляе карэспандэнт БЕЛТА.
Цырымонія ўручэння даверчых грамат прайшла ў Елісейскім палацы. Каля палаца замежных паслоў вітала Рэспубліканская гвардыя Францыі. Аркестр гвардыі выканаў ваенны марш у гонар новаакрэдытуемых у Парыжы паслоў.
У гутарцы з Паўлам Латушкам Франсуа Аланд выказаўся за актывізацыю эканамічных адносін паміж Францыяй і Беларуссю, станоўча адзначыўшы намаганні беларускага боку ў гэтым напрамку.
Пасол Беларусі ў сваю чаргу падкрэсліў, што ў якасці прыярытэтаў сваёй дыпламатычнай дзейнасці ў Францыі бачыць садзейнічанне актывізацыі гандлёва-эканамічнаму супрацоўніцтву і развіццё сувязей у галіне культуры. Павел Латушка адзначыў, што сённяшні ўзровень беларуска-французскага эканамічнага супрацоўніцтва не адпавядае патэнцыялу дзвюх краін.
Кіраўнік беларускай дыпмісіі падкрэсліў, што Беларусь гістарычна належыць да адзінай агульнаеўрапейскай прасторы, беларуская культура з'яўляецца часткай еўрапейскай і ўнесла значны ўклад у яе развіццё. Беларусь і Францыю аб'ядноўвае таксама тое, што на беларускай зямлі нарадзіліся Марк Шагал, Хаім Суцін, Адам Міцкевіч, Іосіф Цадкін, іншыя славутыя асобы, якія ўнеслі значны ўклад у развіццё культур Беларусі і Францыі, а таксама еўрапейскай.
У якасці памятнага падарунка Прэзідэнту Францыі быў перададзены твор сучаснага беларускага мастака з Віцебска Алега Скавародкі "Прагулка". Творчасць віцебскага мастака - прадаўжэнне развіцця сусветна вядомай віцебскай школы жывапісу.
Пн | Аўт | Сер | Чцв | Пт | Сб | Нядз |
---|