Прамовы і інтэрв’ю

2 снежня, Мінск /Кар. БЕЛТА/. МАГАТЭ высока ацэньвае прыхільнасць урада Беларусі да пытанняў ядзернай бяспекі. Аб гэтым сёння заявіў журналістам намеснік гендырэктара Міжнароднага агенцтва па атамнай энергіі Дэніс Флары, перадае карэспандэнт БЕЛТА.

"Сёння мы сустрэліся з першым намеснікам прэм'ер-міністра Беларусі. Гэта сустрэча дэманструе моцную прыхільнасць урада Беларусі да пытанняў ядзернай бяспекі, культуры бяспекі. Мы вельмі высока ацэньваем узровень гэтай прыхільнасці", - адзначыў Дэніс Флары.

Намеснік гендырэктара МАГАТЭ адзначыў, што заўтра ён наведае БелАЭС, але гэта не будзе ацэначная місія. "Роля МАГАТЭ - аказанне экспертнай падтрымкі дзяржавам, асабліва на стадыі праектавання і ўзвядзення атамных станцый. Наколькі я ведаю, Беларусь рыхтуецца да прыняцця ацэначных місій", - дадаў ён.

У Мінску 2-3 снежня праходзіць візіт дэлегацыі высокага ўзроўню па пытаннях развіцця культуры бяспекі ў ядзернай сферы пад кіраўніцтвам намесніка гендырэктара МАГАТЭ. У склад дэлегацыі ўвайшлі прадстаўнікі рэгулюючых органаў Францыі, Расіі, ЗША, В'етнама, а таксама эксперты МАГАТЭ, Форуму супрацоўніцтва рэгулятараў, Еўракамісіі. У час візіту запланаваны сустрэчы ў Савеце Міністраў, Міністэрстве энергетыкі і Міністэрстве па надзвычайных сітуацыях Беларусі, семінар для прадстаўнікоў органаў дзяржаўнага кіравання і арганізацый, што прымаюць удзел у рэалізацыі беларускай ядзерна-энергетычнай праграмы, па пытаннях развіцця культуры бяспекі. Прадугледжаны семінар для супрацоўнікаў Дэпартамента па ядзернай і радыяцыйнай бяспецы МНС аб характарыстыках, прынцыпах і падыходах да фарміравання культуры бяспекі спецыялістаў рэгулюючага органа. Візіт дэлегацыі ініцыіраваны беларускім бокам.