Прамовы і інтэрв’ю

13 жніўня, Масква /БЕЛТА - ІТАР-ТАСС/. Расія дамовілася з Беларуссю аб дадатковых пастаўках прадуктаў харчавання для пакрыцця дэфіцыту ад увядзення харчовага эмбарга, аб'ём паставак будзе вызначаны на працягу некалькіх тыдняў. Аб гэтым заявіў віцэ-прэм'ер Расіі Аркадзь Дварковіч у эфіры "Расіі 24".

"Такія магчымасці ў нашых беларускіх калег ёсць, і па мясе, і па малацэ, і па сырах, і па бульбе. Мы дамовіліся на працягу некалькіх дзён зверыць балансы і дамовіцца аб максімальных і мінімальных аб'ёмах паставак", - сказаў Дварковіч. Пасля гэтага будуць вызначаны кантрактныя ўмовы гэтых паставак, дадаў ён.

Паводле слоў віцэ-прэм'ера, дысбаланс паставак прадуктаў харчавання ў Калінінградскай вобласці ў многім будзе закрыты беларускімі таварамі. "Я лічу, што дысбаланс на калінінградскім рынку якраз у многім будзе закрыты беларускімі таварамі. Мы разлічваем на нашых сяброў", - сказаў ён.

Разам з тым, урад РФ не бачыць ніякіх падстаў для залішняга росту цэн на прадукты харчавання, заявіў Дварковіч. Ён адзначыў, што па асобных пазіцыях заяўляецца невялікі рост цэн у бліжэйшы час. "Але такое адбываецца кожны год, і ў гэтым нічога дзіўнага няма", - сказаў віцэ-прэм'ер.

Таксама ён назваў правакацыяй чуткі аб росце цэн на рыбную прадукцыю кампаніі "Рускае мора" з-за харчовых санкцый. "З'явіліся чуткі, што выраслі цэны на рыбу, былі спасылкі на такую кампанію, як "Рускае мора". Праверылі - гэта не так, гэта была беспадстаўная інфармацыя, відаць, спецыяльна для правакавання нейкіх чутак", - заявіў ён.

Прэм'ер-міністру РФ Дзмітрыю Мядзведзеву праз 10 дзён будуць прадстаўлены прапановы па павелічэнні вытворчасці ў РФ мяса, малака, агародніны і фруктаў, сказаў Дварковіч. "Адбудзецца нарада на гэту тэму, - сказаў ён. - А ў цэлым такія карэкціроўкі (у дзяржпраграму па развіцці АПК) павінны быць сфарміраваны да канца верасня".