Прамовы і інтэрв’ю

12 верасня, Віцебск /Алена Ціханава - БЕЛТА/. Спрашчэнне працэдуры працаўладкавання ўкраінскіх мігрантаў садзейнічае іх хутчэйшай адаптацыі і інтэграцыі ў беларускае грамадства. Такое меркаванне выказаў 11 верасня ў Віцебску журналістам прадстаўнік Упраўлення Вярхоўнага камісара ААН (УВКБ ААН) па справах бежанцаў у Беларусі Жан Іў Бушардзі, перадае карэспандэнт БЕЛТА.

Прадстаўнік камісіі ААН па справах бежанцаў прыбыў у Віцебск разам з дэлегацыяй прадстаўнікоў пасольстваў, акрэдытаваных у Беларусі. Размаўляючы з журналістамі пасля афіцыйнай сустрэчы з кіраўніцтвам аблвыканкама, Жан Іў Башурдзі адзначыў, што ў Беларусі добра наладжана работа з мігрантамі ў частцы праходжання працэдуры афармлення статусу бежанца, вымушаныя перасяленцы маюць доступ да адукацыйных і медыцынскіх паслуг.

"У сувязі з павелічэннем колькасці грамадзян, якія прыбываюць з Украіны, краіне даводзіцца сутыкацца з вялікай колькасцю выклікаў, - адзначыў прадстаўнік УВКБ ААН. - Прыняцце спецыяльнага ўказа - гэта, безумоўна, вельмі добры захад, які садзейнічае таму, каб грамадзяне Украіны, якія сюды прыехалі, хутчэй адаптаваліся. У прыватнасці, гэта датычыцца спрашчэння пытання працаўладкавання".

У час сустрэчы з намеснікам старшыні Віцебскага аблвыканкама Алегам Мацкевічам, кіраўніцтвам камітэта па працы, занятасці і сацыяльнай абароне, прадстаўнікамі міграцыйнай службы і абласной арганізацыі БТЧК прадстаўнік УВКБ ААН адзначыў, што паміж упраўленнем па справах бежанцаў і Віцебскай вобласцю наладжана добрае доўгатэрміновае супрацоўніцтва. "Віцебск - першы рэгіён Беларусі, дзе быў створаны пункт часовага пасялення бежанцаў. Тут паспяхова рэалізуюцца 2 праекты міжнароднай тэхнічнай дапамогі, што фінансуюцца Еўрапейскай камісіяй. Адзін накіраваны на мясцовую інтэграцыю бежанцаў, а другі датычыцца ідэнтыфікацыі бежанцаў сярод мігрантаў і забеспячэння іх абароны", - сказаў дыпламат. Ён даў станоўчую ацэнку рабоце ў гэтым напрамку камітэта па працы, занятасці і сацыяльнай абароне, адзначыў важнасць моўнага навучання мігрантаў, якое праводзіцца на базе дзяржуніверсітэта імя Машэрава.

Дэлегацыя прадстаўнікоў пасольстваў, акрэдытаваных у Беларусі, прадстаўніка Упраўлення Вярхоўнага камісарыята ААН па справах бежанцаў у Беларусі прабудзе ў Віцебскай вобласці 2 дні. 12 верасня дыпламаты плануюць пабываць у ААТ "Віцебскхлебпрам" і "Чырвоны Кастрычнік", якія атрымалі фінансаванне для стварэння рабочых месц для мігрантаў. Члены дэлегацыі азнаёмяцца са становішчам бежанцаў і асоб, якія хадайнічаюць аб прадастаўленні абароны ў Беларусі, практыкай работы па аказанні розных відаў дапамогі гэтай катэгорыі грамадзян з боку дзяржаўных і няўрадавых арганізацый.