Прамовы і інтэрв’ю

30 ліпеня, Мінск /Святлана Саўко - БЕЛТА/. Беларусь разлічвае ў бліжэйшы час вырашыць гандлёвыя рознагалоссі з Украінай. Аб гэтым заявіў 29 ліпеня журналістам дырэктар дэпартамента знешнеэканамічнай дзейнасці Міністэрства замежных спраў Беларусі Ігар Назарук, перадае карэспандэнт БЕЛТА.

Ігар Назарук падкрэсліў, што ў гэтым выпадку размова не ідзе аб канфлікце і тым больш надыходзячай гандлёвай вайне. "Ёсць нейкае неразуменне. Выхад з сітуацыі бачыцца ў аператыўным і цесным дыялогу, узаемадзеянні з нашымі ўкраінскімі партнёрамі. Без гэтага мы сабе не ўяўляем вырашэнне сітуацыі", - сказаў дырэктар дэпартамента. У МЗС разлічваюць, што вырашыць пытанне ўдасца на працягу максімум дзесяці дзён.

Рашэнне Міжведамаснай камісіі па міжнародным гандлі Украіны аб увядзенні спецпошліны на імпарт шэрага тавараў з Беларусі ўжо ўступіла ў сілу. У прыватнасці, размова ідзе аб кандытарскіх вырабах, малочнай прадукцыі, электрычных лямпах напальвання, угнаеннях і халадзільніках. Спецпошліна ў памеры 55,29 працэнта мытнага кошту будзе дзейнічаць да 31 снежня 2016 года ўключна. Акрамя таго, уводзіцца спецпошліна адносна імпарту беларускіх гумавых шын, соладавага піва, а таксама камплектуючых для халадзільнага абсталявання. Яе памер - 60,05 працэнта мытнага кошту тавару. Тэрміны прымянення гэтай спецпошліны аналагічныя.

Разам з тым патрабаванне аб ліцэнзаванні паставак гэтых груп тавараў захаваецца, калі адносна беларускіх тавараў будуць уведзены абмежавальныя меры, не прадугледжаныя дагаворам аб зоне свабоднага гандлю. "Мы тым самым паказваем: у нас абмежаванняў няма, але калі Украіна рашэнняў не адмяняе, то мы перагледзім сваю пазіцыю. Тут механізм з засцерагальнымі элементамі", - адзначыў Ігар Назарук. Ён падкрэсліў, што беларускі эксперты настроены на прадаўжэнне кансультацый для выхаду на нармальнае рашэнне, якое задавальняе абодва бакі і заключаецца ў тым, каб цалкам адысці ад непатрэбных перашкод для перамяшчэння тавараў.