Прамовы і інтэрв’ю

10 ліпеня, Віцебск /Алена Ціханава - БЕЛТА/. Фестываль у Віцебску захоўвае славянскія традыцыі. Аб гэтым сёння заявіла Надзея Бабкіна на цырымоніі адкрыцця яе імянной зоркі на Алеі лаўрэатаў спецыяльнай узнагароды Прэзідэнта Беларусі "Праз мастацтва - да міру і ўзаемаразумення", перадае карэспандэнт БЕЛТА.

У мерапрыемстве прынялі ўдзел міністр культуры Беларусі Барыс Святлоў, генеральны дырэктар цэнтра культуры "Віцебск", дырэктар міжнароднага фестывалю мастацтваў "Славянскі базар у Віцебску" Аляксандр Сідарэнка, старшыня Віцебскага гарвыканкама Віктар Нікалайкін, народны артыст Беларусі Анатоль Ярмоленка.

Барыс Святлоў, характарызуючы лаўрэата, адзначыў, што Надзея Бабкіна - сапраўдны дыпламат у галіне культуры, які ўсё жыццё працуе на развіццё дружбы і ўзаемаразумення паміж славянскімі народамі.

Анатоль Ярмоленка ў сваю чаргу падкрэсліў, што з моманту адкрыцця зоркі Надзея Бабкіна і руская песня, якую яна з задавальненнем шмат гадоў выконвае, заўсёды будуць на "Славянскім базары ў Віцебску".

У адказ на віншаванні і цёплыя словы Надзея Бабкіна адзначыла вялікую ролю "Славянскага базару" ў справе яднання. Такія мерапрыемствы нагадваюць славянскім народам аб тым, што яны ўраджэнцы адной зямлі, у іх культурах ёсць шмат агульнага, таго, што аб'ядноўвае на генетычным узроўні. "Славянскі базар" прымае вялікую колькасць краін і разам з тым захоўвае славянскія нацыянальныя традыцыі - мінулыя і сучасныя, - сказала Надзея Бабкіна. - Галоўная яго ідэя - гэта аб'яднанне, саборнасць людзей. Самае страшнае ў жыцці, калі чалавек адзінокі, калі ён не запатрабаваны. А вось такія маштабныя фестывалі дзяржаўнага і сусветнага значэння даюць нам магчымасць з'ядноўвацца".

Надзея Бабкіна адзначыла, што ўдзельнічае ў форуме практычна з яго стварэння і бачыць, што на працягу двух дзесяцігоддзяў фестываль захоўвае сваю прывабнасць. "Я ўдзячна Прэзідэнту Беларусі Аляксандру Рыгоравічу Лукашэнку за тое, што ён мэтанакіравана падтрымлівае традыцыі розных народаў, якія дэманструюцца не толькі на сцэне "Славянскага базару", але і ў іншых гарадах і раёнах Беларусі. Я ўдзячна, што гэта захоўваецца і рухаецца далей, ствараецца", - падкрэсліла артыстка і пажадала працвітання Беларусі, даўгалецця "Славянскаму базару" і ўсім міру.