Прамовы і інтэрв’ю

20 красавіка, Мінск /Кар. БЕЛТА/. Беларусь, як ні адна іншая краіна, падыходзіць для правядзення чэмпіянату свету па хакеі. Такое меркаванне выказаў пераможца міжнароднага песеннага конкурсу "Еўрабачанне-2009" нарвежац з беларускімі каранямі Аляксандр Рыбак у інтэрв'ю праграме "Карціна свету" на тэлеканале "РТР-Беларусь", паведамляе БЕЛТА.

“Я пастаянна езджу па ўсім свеце, і Мінск - гэта адзіны горад, дзе дазваляю сабе пагуляць, паглядзець вакол. Я вельмі люблю і паважаю сваю Радзіму. Мінск заўсёды быў шыкоўны. І калі дзе і праводзіць сусветныя конкурсы і спаборніцтвы, то толькі тут", - адзначыў Аляксандр Рыбак.

Паводле яго слоў, новыя аб'екты і будынкі, якія з'явіліся ў Мінску за апошні час - вялікі плюс і бонус для горада. "Мне вельмі падабаецца, што ўсе будынкі, якія пабудавалі ў Мінску для чэмпіянату, будуць запатрабаваны пасля яго заканчэння і самімі беларусамі, і турыстамі. У многіх краінах, і гэта відаць, тыя будынкі, якія былі ўзведзены да нейкай падзеі, потым застаюцца зусім непатрэбнымі, іх проста не ведаюць, як выкарыстоўваць. У Мінску ўсё зроблена правільна, прадумана, я магу толькі апладзіраваць", - расказаў выканаўца.

Прыйшоўся даспадобы праслаўленаму ўраджэнцу Беларусі і талісман маючага адбыцца чэмпіянату - зубр Волат. "Мне вельмі прыемна, што талісманам чэмпіянату выбраны зубраня - ён такі мілы. У іншых краінах такія сімвалы звычайна вельмі дарослыя, такія мускулістыя. А ў Мінску, адразу відаць, чэмпіянат будзе для ўсёй сям'і. Я ўпэўнены, што няма лепшай краіны, каб праводзіць хакейны чэмпіянат. Бо тут усе гуляюць у хакей, і нават зубраня", - сказаў выканаўца.

Аляксандр Рыбак таксама прызнаўся, што не саромеецца ў сваіх паездках па свеце прызнавацца ў любові да роднай Беларусі. "Я вельмі ўзрадаваўся, калі мне выпала магчымасць выступіць у Оршы. Я ведаю, што Беларусь - вельмі прыгожая краіна, і пастаянна ўсім расказваю, як яе люблю. А потым я задумаўся: я ж быў толькі ў Мінску. А раптам уся іншая краіна проста разваленая? Аказваецца, у Беларусі прыгожа ўсюды. І зусім не так, як у некаторых славянскіх краінах, дзе сталіца проста шыкоўная, а ўсе астатнія пакутуюць. Зусім няма. Дзяржава ў Беларусі сочыць за тым, каб ва ўсіх іншых гарадах і нават невялікіх паселішчах людзям жылося добра", - сказаў спявак.

Акрамя таго, Аляксандр Рыбак расказаў, што даверыў бы напісаць гімн для чэмпіянату свету па хакеі зусім маладым выканаўцам, пра якіх яшчэ ніхто не ведае. "Гімн - гэта нешта чароўнае. Я вельмі паважаю момант, калі ўсе разам выконваюць нацыянальны гімн, ад усяго сэрца. А напісаць песню для чэмпіянату - прывілея зусім новых артыстаў, яшчэ невядомых. Я лічу, што тут трэба паэксперыментаваць. Бо самае галоўнае - спорт, гэта ж не музычны конкурс. І ўсё навокал павінна быць свежым і арыгінальным. Я ўпэўнены, што ў Беларусі ў гэтых адносінах усё атрымаецца вельмі добра", - адзначыў выканаўца.

Аказалася, што беларускі нарвежац добра знаёмы з хакеем і нават больш таго - ён сам майстар лядовых баталій. Толькі віртуальных. "У мяне ёсць гульнявая прыстаўка да тэлевізара - Xbox. Я гуляю там у хакей, і заўсёды - за беларускую каманду", - прызнаўся ён. Паводле слоў Аляксандра Рыбака, камандны спорт яму вельмі блізкі. “Там усе члены каманды адзіныя - не важна, перамаглі яны або прайгралі. Яны ўсё перажываюць разам. Мне не хапала гэтага пачуцця ў час "Еўрабачання", - расказаў ён. На чэмпіянаце ў Мінску выканаўца будзе асабліва перажываць за беларускую зборную. "Я вельмі спадзяюся, што змагу неўзабаве пазнаёміцца з беларускай камандай. Я балею за зборную, жадаю ігракам удачы і хачу, каб яны выйгравалі не толькі ў мяне ў Xbox, але і ў рэальным жыцці", - падагульніў спявак.