1 красавіка, Мінск /Кар. БЕЛТА/. Рэзультатыўнасць работы беларускіх вучоных стануць ацэньваць па міжнародных крытэрыях. Аб гэтым заявіў Прэзідэнт Беларусі Аляксандр Лукашэнка 31 сакавіка на нарадзе з вядучымі вучонымі па пытанні перспектыў развіцця навукі, паведамілі БЕЛТА ў прэс-службе кіраўніка дзяржавы.
Аляксандр Лукашэнка падкрэсліў, што з бюджэту прадоўжыцца фінансаванне толькі тых напрамкаў, дзе склаліся вядомыя навуковыя школы, напрыклад, оптыкі, лазернай фізікі, цеплафізікі, біяарганічнай хіміі і матэрыялазнаўства. "Аднак меркаваць аб рэзультатыўнасці вашай работы у гэтай галіне будзем па міжнародных крытэрыях", - адзначыў Прэзідэнт.
У свеце сфарміравалася сістэма вызначэння ўзроўню даследаванняў. Яна грунтуецца на адсочванні індэксаў цытавання вучоных, іх удзелу ў значных міжнародных форумах, прысутнасці ў рэдкалегіях міжнародных часопісаў. "Гэтыя паказчыкі, а не апавяданні пра сябе любімых павінны стаць асновай ацэнкі вынікаў вашай працы", - сказаў кіраўнік дзяржавы, звяртаючыся да вучоных.
"Можна развіваць і іншыя напрамкі, усё, што вы палічыце патрэбным. Але з выкарыстаннем магчымасцей міжнароднага супрацоўніцтва і кааперацыі", - дадаў Прэзідэнт.
Аляксандр Лукашэнка лічыць, што трэба падумаць аб прыцягненні да беларускіх праектаў замежных даследчыкаў з сусветнымі імёнамі, а таксама аб інтэграцыі беларускіх навуковых школ у міжнародную супольнасць за кошт вучоных-беларусаў, якія атрымалі прызнанне за мяжой.
"Але пры гэтым нельга забываць і аб "эфекце пыласоса", калі так званыя міжнародныя навуковыя праекты служаць сродкам выцягвання з краіны мазгоў. З такімі фактамі нам ужо давялося сутыкнуцца. Трэба стварыць сваю сістэму процідзеяння і адначасова "прыцягвання мазгоў", перадавых ідэй і тэхналогій", - адзначыў Прэзідэнт, дадаўшы, што гэтымі пытаннямі трэба заняцца ўраду і НАН.
Кіраўнік дзяржавы дадаў, што фундаментальныя навукі ў Беларусі разглядаюцца перш за ўсё як сродак падтрымання інтэлектуальнага ўзроўню грамадства і база вышэйшай адукацыі.
Пн | Аўт | Сер | Чцв | Пт | Сб | Нядз |
---|