Прамовы і інтэрв’ю

16 верасня, Мінск /Кар. БЕЛТА/. Прэзідэнт Беларусі Аляксандр Лукашэнка 16 верасня сустрэўся са старшынёй Палаты прадстаўнікоў Нацыянальнага сходу Уладзімірам Андрэйчанкам, паведамілі БЕЛТА ў прэс-службе беларускага лідара.

Ён праінфармаваў кіраўніка дзяржавы аб выніках мінулай сесіі Палаты прадстаўнікоў, а таксама аб парадку дня маючай адбыцца асенняй сесіі, якая адкрыецца 2 кастрычніка, і прапануемых для разгляду на ёй законапраектах.

Прэзідэнт асаблівую ўвагу звярнуў на падрыхтоўку праекта закона аб рэспубліканскім бюджэце на 2014 год.

"Самае галоўнае - гэта перспектывы, а яны звязаны перш за ўсё з бюджэтам", - падкрэсліў кіраўнік дзяржавы. Аляксандр Лукашэнка пацікавіўся, наколькі дэпутаты далучаны да работы, звязанай з падрыхтоўкай гэтага законапраекта, паколькі ўжо склалася добрая практыка, калі на самых першых этапах старшыня адпаведнай парламенцкай камісіі, дэпутаты, спецыялісты падключаюцца да такой работы.

Пры гэтым кіраўнік дзяржавы растлумачыў, чаму яго цікавіць гэта пытанне: "Апошнім часам было дастаткова фактаў, калі мы нешта планавалі, і быццам бы правільна планавалі, але не заўсёды ўсё атрымліваецца. Хацелася б, каб дэпутаты ўніклі ў гэту сітуацыю і паглядзелі з крытычнага пункту гледжання на работу ўрада ў плане не толькі бюджэту і асноўных паказчыкаў, але і ў цэлым планаў на будучы год".

"Зразумела, што сітуацыя няпростая ў сусветнай эканоміцы, але тым не менш мы павінны зыходзіць з рэальнай сітуацыі і вызначаць аб'ектыўна тыя ўзроўні і параметры, на якія павінна выйсці краіна", - падкрэсліў Прэзідэнт.

Кіраўнік дзяржавы лічыць: "Дэпутатам трэба больш актыўна і крытычна ўдзельнічаць у падрыхтоўцы гэтых дакументаў, каб пры разглядзе на ўзроўні Прэзідэнта мы мелі ўсе пункты гледжання на тую ці іншую праблему".

Уладзімір Андрэйчанка расказаў, што ў парадак дня асенняй сесіі ўжо ўнесена 66 пытанняў.

Акрамя закона аб рэспубліканскім бюджэце на сесіі таксама плануецца прыняць закон аб унясенні змяненняў і дапаўненняў у выбарчае заканадаўства. Паводле слоў спікера парламента, дэпутаты цяпер актыўна працуюць над падрыхтоўкай праекта бюджэту Саюзнай дзяржавы на 2014 год.

Прэзідэнт цікавіўся таксама пытаннямі міжнароднай парламенцкай дзейнасці. Кіраўнік дзяржавы выказаў меркаванне, што неабходна больш увагі ўдзяляць супрацоўніцтву з парламентамі Расіі, іншых краін СНД, а таксама прадаўжаць дыялог з парламентарыямі Еўрапейскага саюза.

У сувязі з гэтым Уладзімір Андрэйчанка паведаміў, што ў бліжэйшы час плануецца правядзенне ў Беларусі каардынацыйнай нарады старшынь камітэтаў (камісій) па абароне і бяспецы парламентаў краін АДКБ.

Старшыня Палаты прадстаўнікоў таксама расказаў, што з візітамі ў Беларусі плануюць пабываць парламенцкія дэлегацыі В'етнама, Турцыі, Нігерыі.

Прэзідэнт таксама звярнуў увагу на неабходнасць больш сур'ёзнай работы з выбаршчыкамі ў акругах. Аляксандр Лукашэнка адзначыў, што дэпутаты павінны заўсёды знаходзіцца на пярэднім краі гэтай работы і аказваць усялякую дапамогу мясцовым органам улады ў вырашэнні надзённых пытанняў.