Падзеі, факты, анонсы

VII Беларускі міжнародны медыяфорум адкрыўся 28 мая ў Мінску

29 мая, Мінск /Кар. БЕЛТА/. VII Беларускі міжнародны медыяфорум "Партнёрства ў імя будучага: мадэлі новай эпохі" адкрыўся 28 мая ў Мінску, паведамляе карэспандэнт БЕЛТА.

Медыяфорум сабраў больш за 100 удзельнікаў з 16 краін свету. Запрошаны эксперты, палітолагі, эканамісты, вядучыя медыйныя персоны краін Садружнасці, Балтыі, Кубы, Кітая, Індыі, Венесуэлы, сярод якіх і кіраўнікі большасці інфармацыйных агенцтваў краін СНД.

28 мая ўдзельнікі медыяфоруму сустрэнуцца з міністрам спорту і турызму Беларусі Алегам Качаном, са старшынёй Мінгарвыканкама Мікалаем Ладуцькам, са старшынёй Камітэта архітэктуры і горадабудаўніцтва Мінгарвыканкама Аляксандрам Пятровым, у размове з якімі ў тым ліку будзе закранута тэма падрыхтоўкі Мінска да чэмпіянату свету па хакею-2014. Акрамя таго, запланавана наведванне Парку высокіх тэхналогій і Нацыянальнай акадэміі навук. Таксама адбудзецца XV пасяджэнне Савета кіраўнікоў дзяржаўных інфармацыйных агенцтваў краін СНД, будзе дадзены старт Міжнароднаму фестывалю тэлевізійных праграм.

У Нацыянальнай бібліятэцы Беларусі 29 мая адбудзецца пленарнае пасяджэнне медыяфоруму, на якім будуць абмяркоўвацца наступныя тэмы: "Новая геапалітыка Еўразіі", "Інтэграцыя як фактар эканамічнага развіцця", "Медыясфера: выклікі і трэнды".

Летняя школа журналістыкі будзе арганізавана 30 мая. У Інстытуце журналістыкі Беларускага дзяржаўнага ўніверсітэта адбудуцца тэматычныя круглыя сталы, а вядучыя журналісты Беларусі і краін Еўразіі дадуць майстар-класы маладым калегам. У гэты ж дзень у Полацку для ўдзельнікаў будзе арганізавана эксперт-сесія "Полацк - калыска беларускай дзяржаўнасці і духоўнасці" (з наведваннем аб'ектаў гісторыка-культурнай спадчыны Полацка), эксперт-сесія "Наваполацк - горад спадарожнік" (наведванне ААТ "Нафтан"), а таксама эксперт-сесія "Аграэкатурызм у Беларусі" (наведванне аграсядзібы).

Завершыцца медыяфорум 31 мая праектам "2012 - Год кнігі. Беларусь літаратурная", прымеркаваным да 130-годдзя з дня нараджэння класікаў беларускай літаратуры Якуба Коласа і Янкі Купалы. Удзельнікі пабываюць у музеі Я.Коласа (Мінск), у музеі-сядзібе Я.Купалы (в.Вязынка).

Беларускі міжнародны медыяфорум традыцыйна выступае дыскусійнай пляцоўкай для абмену думкамі і выпрацоўкі новых ідэй і канцэпцый прадстаўнікамі экспертнай і медыясупольнасці краін СНД, блізкага і далёкага замежжа. Цяперашні форум прызначаны звярнуць увагу на надзённыя праблемы сучаснасці ва ўмовах фарміравання новых геапалітычных рэалій. Будаўніцтва Саюзнай дзяржавы, стварэнне Адзінай эканамічнай прасторы Беларусі, Расіі і Казахстана, уплыў інтэграцыйных працэсаў на развіццё суверэнных дзяржаў, роля СМІ ва ўмовах трансфармацыі грамадскіх рэалій і развіцця тэхналогій. Гэтыя і іншыя тэмы стануць ключавымі на форуме.

Арганізатарамі мерапрыемства выступаюць Міністэрства інфармацыі Беларусі, Пастаянны камітэт Саюзнай дзяржавы, Міждзяржаўны фонд гуманітарнага супрацоўніцтва дзяржаў - удзельніц СНД, Беларускі саюз журналістаў.

версія для друку

зрабіць стартавай

дабавіць у выбранае