Падзеі, факты, анонсы

Паводле слоў дырэктара Нацыянальнай бібліятэкі Беларусі Рамана Матульскага, факсімільныя копіі, надрукаваныя тыражом 500 экзэмпляраў, прызначаны для вузкага кола спецыялістаў. "Каб самы старажытны помнік кніжнай культуры, створаны на тэрыторыі сучаснай Беларусі, стаў даступны больш шырокім слаям грамадскасці, у бліжэйшы час плануецца выдаць Тураўскае Евангелле камерцыйным тыражом", - дадаў ён.

Работа па ўзнаўленні беларускіх помнікаў пісьменства будзе прадаўжацца і па іншых напрамках. Да 500-годдзя беларускага кнігадрукавання, якое будзе адзначацца ў 2017 годзе, запланавана выданне поўнага збору кніг Францыска Скарыны. Першыя пяць тамоў збору ўжо выдадзены, на чарзе яшчэ шэсць тамоў. Шматтомнае факсімільнае выданне ўпершыню дасць магчымасць сабраць разам усе кнігі, надрукаваныя Францыскам Скарынам у Празе (1517-1519) і Вільнюсе (1522-1525). У аснове выдання - электронныя копіі кніг першадрукара, якія захоўваюцца ў бібліятэках і музеях Беларусі, Расіі, Украіны, Германіі і іншых краін.

Рукапіс Тураўскага Евангелля быў знойдзены ў 1865 годзе ў Тураве і з таго часу знаходзіцца на пастаянным захоўванні ў Бібліятэцы Акадэміі навук Літвы імя Урублеўскіх (Вільнюс). Помнік уяўляе сабой Евангелле з укладнымі запісамі, два з якіх былі зроблены ў пачатку XVI стагоддзя ад імя князёў Астрожскіх.