Падзеі, факты, анонсы

24 жніўня, Мінск /Кар. БЕЛТА/. Тэлегледачы змогуць прагаласаваць за фіналіста беларускага адбору дзіцячага "Еўрабачання-2016" на працягу 10 мінут, паведамілі БЕЛТА ў прэс-службе Белтэлерадыёкампаніі.

Да фіналу нацыянальнага адборачнага тура дзіцячага "Еўрабачання" засталося два дні. Прадаўжаецца падрыхтоўка да гала-канцэрта, які адбудзецца 26 жніўня ў студыі "600 метраў" медыяхолдынга. Сёння ўвечары ў студыі пройдуць індывідуальныя рэпетыцыі ўсіх дзесяці прэтэндэнтаў на перамогу. Заўтра, 25 жніўня, удзельнікі фіналу выйдуць на сцэну ў сцэнічных касцюмах, ва ўмовах, максімальна набліжаных да прамога эфіру грандыёзнага шоу, якое адбудзецца ў пятніцу. Генеральная рэпетыцыя фінальнага гала-канцэрта адбудзецца 26 жніўня з 16.00 да 18.00.

Фінальнае шоу ў форме гала-канцэрта ў прамым эфіры на тэлеканалах "Беларусь 1" і "Беларусь 24", а таксама ў анлайн-трансляцыі на афіцыйным сайце медыяхолдынга пачнецца 26 жніўня ў 22.00.

Афіцыйны беларускі прадстаўнік на дзіцячым конкурсе будзе вызначаны па выніках галасавання прафесійнага журы і тэлегледачоў. Магчымасць прыняць удзел у тэлефонным і SMS-галасаванні кожнаму абаненту сеткі стацыянарнай сувязі і ўсіх сотавых сетак краіны забяспечыць кампанія "Белтэлекам". Тэлефонныя нумары для галасавання паведамяць тэлегледачам вядучыя канцэрта - Тэа і Вольга Рыжыкава. Яны таксама будуць абазначаны эфірнай графікай у час трансляцыі. Працягласць часу тэлегаласавання складзе 10 мінут.

Пераможца прадставіць краіну на прэстыжным конкурсе 20 лістапада бягучага года ў горадзе Валета (Мальта). Арганізацыю нацыянальнага адбору і падрыхтоўку да міжнароднага дзіцячага конкурсу песні "Еўрабачанне-2016" ажыццяўляе Белтэлерадыёкампанія як адзіны ў Беларусі член Еўрапейскага вяшчальнага саюза.