Падзеі, факты, анонсы

Інтэграваны турнір па новусу адбудзецца паміж прадстаўнікамі Мінска і Магілёва на базе тэрытарыяльнага цэнтра сацыяльнага абслугоўвання насельніцтва (ТЦСАН) Маскоўскага раёна г.Мінска.

У турніры прымуць удзел ігракі ў новус з парушэннямі апорна-рухальнага апарату, іншыя аматары гэтага віду спорту. Унікальнасць мерапрыемства заключаецца ў сумесным удзеле ў ім людзей з інваліднасцю і без яе, адзначылі арганізатары.

Суарганізатарамі турніру з'яўляюцца грамадскае аб'яднанне інвалідаў "Асаблівы свет", Федэрацыя новуса г.Мінска, ГА "Магілёўская арганізацыя рэабілітацыі і спорту інвалідаў-калясачнікаў", ТЦСАН Маскоўскага і Першамайскага раёнаў сталіцы. Валанцёрскую падтрымку акажуць студэнты кафедры фізічнай рэабілітацыі Беларускага дзяржаўнага ўніверсітэта фізічнай культуры.

Прыдумалі гэту гульню вікінгі, а масавае распаўсюджванне пачалося ў ХХ стагоддзі. У яе гулялі англійскія маракі ў партовых корчмах і пабах, якія выкарыстоўвалі эскізы, знойдзеныя ў скандынаўскіх летапісах, для стварэння сталоў для більярда. У далейшым новус стаў нацыянальным відам спорту ў краінах Балтыі, таму атрымаў яшчэ адну назву - балтыйскі більярд. Адзіныя правілы абнародаваны ў 1932 годзе ў Латвіі. У тым жа годзе ў Рызе адбыліся першыя прафесійныя спаборніцтвы. Правілы новуса даволі простыя. У гульні важныя разлік і дакладнасць, а не сіла.