28 студзеня, Віцебск /Кар. БЕЛТА/. Пачаўся прыём заявак на ўдзел у конкурсах
XXIII Міжнароднага фестывалю мастацтваў "Славянскі базар у Віцебску", паведамілі карэспандэнту БЕЛТА ў Цэнтры культуры "Віцебск".У адборы могуць прымаць удзел выканаўцы, якія маюць вопыт выступлення на розных канцэртных мерапрыемствах, а таксама паспяхова сябе праявілі на музычных конкурсах рэспубліканскага і міжнароднага ўзроўняў. Узроставыя рамкі для
XXIII Міжнароднага конкурсу выканаўцаў эстраднай песні "Віцебск-2014" - 18-31 год, для XII Міжнароднага дзіцячага музычнага конкурсу "Віцебск-2014" - 7-12 гадоў.Прыём заявак на ўдзел у адборачных турах ажыццяўляецца да 15 сакавіка ўключна. Усе заяўкі накіроўваюцца ў Міністэрства культуры Рэспублікі Беларусь на адрас: 220004, г. Мінск, праспект Пераможцаў, 11. Расходы, звязаныя з удзелам у першым і другім этапах адборачных тураў, аплачваюцца ўдзельнікамі самастойна.
Не прымаюцца да разгляду матэрыялы, накіраваныя пазней за 15 сакавіка, а таксама з парушэннем правіл, устаноўленых пастановай Міністэрства культуры Рэспублікі Беларусь ад 26 сакавіка 2009 г. нумар 7 "Аб зацвярджэнні інструкцыі аб правядзенні адборачных тураў да Міжнароднага конкурсу выканаўцаў эстраднай песні "Віцебск" і Міжнароднага дзіцячага музычнага конкурсу "Віцебск".
Першы этап адбору пройдзе з 16 па 25 сакавіка: экспертная група азнаёміцца з прысланымі відэаматэрыяламі ўдзельнікаў і адбярэ па 10 кандыдатаў для ўдзелу ў кожным з конкурсаў. Для правядзення другога этапу адабраныя выканаўцы будуць запрошаны 10 красавіка ў Мінск для праслухоўвання ў суправаджэнні фанаграмы "мінус адзін". У выніку прафесійнае журы вызначыць аднаго саліста для ўдзелу ў конкурсе выканаўцаў эстраднай песні і двух салістаў для дзіцячага музычнага конкурсу.
З падрабязнай інфармацыяй аб удзеле ў беларускіх адборачных турах конкурсаў можна азнаёміцца на сайце Міністэрства культуры Рэспублікі Беларусь www.kultura.gov.by.
Пн | Аўт | Сер | Чцв | Пт | Сб | Нядз |
---|