Падзеі, факты, анонсы

14 жніўня, Мінск /Кар. БЕЛТА/. Міжнародны кулінарны фестываль пройдзе 17-18 жніўня ў мінскім парку імя Горкага. Аб гэтым паведамілі журналістам арганізатары мерапрыемства, перадае карэспандэнт БЕЛТА.

Гасцей фестывалю чакаюць дэгустацыі, розныя конкурсы, канцэртная праграма. Таксама арганізатары падрыхтавалі майстар-класы знакамітых повараў па беларускай кухні і кухнях розных краін свету. Стравы для майстар-класаў пакуль трымаюцца ў сакрэце, аднак повары абяцаюць здзівіць мінчан і гасцей сталіцы непрывычным спалучэннем прадуктаў, напрыклад, марожаным з незвычайнымі напаўняльнікамі. Таксама майстры пастараюцца ўстанавіць рэкорд і прыгатуюць вялікую пасту, а каманды вядомых спартсменаў, выканаўцаў і тэлевядучых сустрэнуцца ў кулінарнай бітве. Плануецца, што фестываль наведаюць повары з Італіі, Украіны, Казахстана, Расіі і Прыбалтыкі.

На думку дырэктара дэпартамента па турызму Міністэрства спорту і турызму Вадзіма Кармазіна, такія фестывалі садзейнічаюць развіццю кулінарнага турызму ў краіне. "Сусветная турысцкая арганізацыя вызначае яго як перспектыўны напрамак для развіцця, і мы таксама не павінны адставаць. Кулінарны турызм не залежыць ад сезоннасці, што для Беларусі вельмі важна", - падкрэсліў ён.

Вадзім Кармазін не выключыў магчымасці з'яўлення спецыяльных кулінарных тураў у Беларусь. "У перспектыве ёсць магчымасць арганізаваць кулінарныя туры, якія існуюць у многіх краінах. Мы павінны знайсці сваю адметную асаблівасць і добра яе паказаць, а кулінарныя фестывалі вельмі добра для гэтага падыходзяць", - лічыць ён.

Як адзначыла намеснік міністра гандлю Ірына Наркевіч, кулінарны фестываль не толькі стане забаўляльнай пляцоўкай, але і дапаможа падрыхтаваць сферу паслуг да маючага адбыцца ЧС-2014 па хакею ў Мінску. На яе думку, напярэдадні ЧС-2014 асаблівую ўвагу трэба звярнуць на наяўнасць у меню страў беларускай кухні, хуткасць і якасць абслугоўвання вялікай колькасці людзей адначасова, валоданне персаналу замежнымі мовамі.

Кулінарны фестываль пройдзе другі раз. Арганізатарамі мерапрыемства выступаюць праект "Смачны блог" і Гільдыя повараў і шэф-повараў Беларусі пры падтрымцы Міністэрства гандлю, Міністэрства культуры і Міністэрства спорту і турызму.