18 верасня, Гродна /Алена Стасюкевіч - БЕЛТА/. Міжнародны фестываль феерверкаў пройдзе ў Ваўкавыску 21 верасня ў час раённых "Дажынак", прысвечаных заканчэнню ўборкі ўраджаю і ўшаноўванню ўдзельнікаў жніва, паведамілі карэспандэнту БЕЛТА ў Ваўкавыскім райвыканкаме.
На свята запрошаны вядомыя піратэхнічныя каманды, прызёры міжнародных паказаў з Літвы, Украіны, Расіі і Беларусі. Лепшае піратэхнічнае шоу вызначыць судзейская калегія з удзелам прадстаўнікоў Расійскай піратэхнічнай асацыяцыі, асацыяцыі "БелПіратэхніка", Еўрапейскай піратэхнічнай асацыяцыі EUFIAS. Пасля заканчэння конкурснай праграмы піратэхнікаў адбудзецца гранд-феерверк ад расійскай кампаніі "Кальвін".
Пройдуць таксама міжнародныя спаборніцтвы па шатакан каратэ-до, выступленні творчых калектываў Гродзенскай вобласці і канцэрт А.Хлястова. Будуць працаваць гандлёвыя і кірмашовыя павільёны.
Пачатак фестывалю ў 12.00, піратэхнічныя шоу пачнуцца ў 21.00. У гэтым годзе арганізатары перанеслі дзейства з ускраіны ў цэнтр горада. Найбольш зручна феерверкі будзе назіраць са сцэнічнай пляцоўкі на плошчы па вул. К.Маркса, уваход на яе бясплатны, растлумачылі ў райвыканкаме.
У Гродзенскай вобласці сумяшчаць святы ўраджаю з разнастайнымі культурна-забаўляльнымі мерапрыемствамі, у тым ліку міжнароднага маштабу, становіцца добрай традыцыяй. Так, у Гродзенскім раёне на "Дажынкі" гасцей запрашаюць да шлюза Дамброўка на Аўгустоўскім канале, дзе працаўнікоў вёскі ўшаноўваюць у рамках міжнароднага фестывалю "Аўгустоўскі канал у культуры трох народаў". У Зэльве раённыя "Дажынкі" ўключаны ў праграму мерапрыемстваў кірмашу "Анненскі кірмаш".
Абласное свята ўраджаю будзе прымеркавана да Дня работнікаў сельскай гаспадаркі і перапрацоўчай прамысловасці АПК і адбудзецца ў Ашмянах.
Пн | Аўт | Сер | Чцв | Пт | Сб | Нядз |
---|