Падзеі, факты, анонсы

Мінск атрымае 400 публічных пунктаў доступу Wi-Fi да хакейнага ЧС-2014

22 студзеня, Мінск /Андрэй Асфура - БЕЛТА/. Да чэмпіянату свету па хакею 2014 года ў Мінску плануецца ўстанавіць каля 400 новых грамадскіх пунктаў доступу ў Інтэрнэт па тэхналогіі Wi-Fi. Аб гэтым паведаміў карэспандэнту БЕЛТА генеральны дырэктар РУП "Белтэлекам" Сяргей Папкоў.

Цяпер у Мінску ўстаноўлена 712 стацыянарных пунктаў доступу Wi-Fi. За паўтара года іх колькасць плануецца павялічыць больш як у 1,5 раза. Гэтага будзе дастаткова, каб забяспечыць патрэбнасці ўдзельнікаў і гасцей хакейнага спаборніцтва, запэўніў гендырэктар.

Бесправадны доступ у Інтэрнэт па тэхналогіі Wi-Fi будзе даступны, найперш, у сталічных гасцініцах і іншых месцах размяшчэння гасцей хакейнага спаборніцтва (прычым сігнал можна будзе прымаць не толькі ў холе, але і ў нумарах), а таксама спартыўных комплексах.

На пытанне аб тым, ці будзе ў час чэмпіянату свету па хакею 2014 года Wi-Fi-доступ прадастаўляцца на асобных аб'ектах бясплатна, кіраўнік кампаніі адказаў, што пакуль такая магчымасць не разглядалася. "Наколькі я разумею, бліжэй да канца года будзе падрыхтавана канцэпцыя прадастаўлення паслуг у час хакейнага чэмпіянату. РУП "Белтэлекам" будзе ўдзельнічаць у акцыях", - растлумачыў Сяргей Папкоў.

версія для друку

зрабіць стартавай

дабавіць у выбранае