26 ліпеня, Мінск /Таццяна Паляжай - БЕЛТА/. Мінскі аквапарк пачне работу 1 мая 2014 года. Аб гэтым далажыў сёння Прэзідэнту Беларусі Аляксандру Лукашэнку ў час наведвання аквапарку, які будуецца, мэр Мінска Мікалай Ладуцька, перадае карэспандэнт БЕЛТА.
Паводле слоў Мікалая Ладуцькі, да канца гэтага года поўнасцю завершацца будаўніча-мантажныя работы і аб'ект пяройдзе ў тэставы рэжым. Цяпер будаўнічая гатоўнасць аквапарку складае 72 працэнты. Паводле слоў мэра Мінска, ужо закуплена ўсё неабходнае абсталяванне для аквапарку, на працягу жніўня яно будзе зманціравана.
Мікалай Ладуцька адзначыў, што ў краіне шмат аб'ектаў праектуюцца і будуюцца сіламі беларускіх спецыялістаў. За 15 гадоў у Беларусі напрацаваны вельмі багаты вопыт. "Мінскі аквапарк з'яўляецца адным з такіх аб'ектаў, мы яго праектавалі самі з нуля. Па наборы функцый, маштабнасці ён з'яўляецца пятым у Еўропе. І, вядома, гэта ўнікальны аб'ект для краіны", - сказаў мэр.
Ён адзначыў, што першапачатковы праект быў крыху зменены. Так, з'явіцца адкрытая аквазона, павялічыцца колькасць водных атракцыёнаў, басейнаў. Усяго ў аквапарку будзе размешчана 11 асноўных водных горак, не ўлічваючы дзіцячыя, 2 дзіцячыя забаўляльныя комплексы - 1 унутры і 1 знадворку. Дзве горкі маюць экстрэмальнасць 8 балаў, дзве - 7 балаў (па 10-бальнай сістэме). Працягласць самай доўгай горкі складае больш як 200 м, вышыня - 20 м. У аквапарку будзе 11 басейнаў, 5 джакузі. Галоўны басейн будзе мець шматлікія вадаспады, фантаны і гейзеры. Частка басейнаў будзе ўяўляць сабой пячору з падсветкай і струменямі, з гэтага ж басейна будзе браць пачатак рака, што выцякае ў лагуну з пляжамі, па-за межамі будынка аквапарку. У цэнтры ракі будзе размешчаны востраў з трапічнай зеленню і абсталяваны пляжам. У закрытай частцы аквапарку будзе знаходзіцца забаўляльны цэнтр з атракцыёнам. На другім і трэцім паверхах аквапарку размесцяцца назіральныя пляцоўкі і падвесны мост над басейнамі і ракой.
У летні час аквапарк змогуць наведваць да 2 тыс. чалавек адначасова, у зімовы - больш як 1,6 тыс. Паслугамі аквапарку могуць скарыстацца і людзі з абмежаванымі магчымасцямі. Побач з аквапаркам будзе размешчаны гасцінічны комплекс, у склад якога ўвойдуць гасцініца эканомкласа ўзроўню "дзве зоркі" і восем катэджаў. Аквапарк з прылеглымі тэрыторыямі займае 38 га.
Мінскія ўлады прапануюць даць аквапарку назву "Купалле". Аднак Аляксандр Лукашэнка не падтрымаў гэту ідэю, адзначыўшы, што над назвай яшчэ трэба падумаць.
Пн | Аўт | Сер | Чцв | Пт | Сб | Нядз |
---|