2 лістапада, Мінск /Кар. БЕЛТА/. З 6 па 9 лістапада ў Мінску пройдуць маладзёжныя навуковыя форумы "Навука і бізнес-2012" і "Навуковыя імкненні-2012". Аб гэтым паведамілі карэспандэнту БЕЛТА ў прэс-службе Нацыянальнай акадэміі навук Беларусі.
У НАН Беларусі адбудзецца II Маладзёжны інавацыйны форум "Навука і бізнес-2012". Чакаецца, што ў ім прымуць удзел больш за 150 маладых вучоных з 11 краін: Беларусі, Азербайджана, Арменіі, Казахстана, Кыргызстана, Малдовы, Расіі, Таджыкістана, Туркменістана, Узбекістана і Украіны.
Форум арыентаваны ў першую чаргу на прыкладныя праекты і канкрэтныя распрацоўкі. "Гэта - першы крок маладых інаватараў да рэалізацыі сваіх ідэй у рэальным сектары эканомікі, унікальная магчымасць заручыцца фінансавай падтрымкай інвестараў, прадставіць свае распрацоўкі і зацікавіць буйнейшыя галіновыя прадпрыемствы", - адзначылі ў НАН Беларусі. Пройдзе выстаўка навуковых дасягненняў і інавацыйных прапаноў. Яна будзе прадстаўлена ў форме індывідуальных і групавых экспазіцый (інфармацыйны стэнд) з дэманстрацыяй прататыпаў і завершаных навуковых распрацовак, арыентаваных на прамое ўкараненне.
Сумесна з форумам пройдзе і III Міжнародная маладзёжная навукова-практычная канферэнцыя "Навуковыя імкненні-2012". Плануецца, што навучэнцамi ўстаноў адукацыі Мінскай вобласці будзе прадстаўлена каля 100 даследчых работ.
Форумы арганізуе Савет маладых вучоных НАН Беларусі. У двух буйных маладзёжных мерапрыемствах прымуць удзел больш за 500 чалавек: маладых вучоных, студэнтаў і школьнікаў.
Пн | Аўт | Сер | Чцв | Пт | Сб | Нядз |
---|