Падзеі, факты, анонсы

12 мая, Мінск /Кар. БЕЛТА/. Краб Пятровіч прадказаў вынікі лядовых баталій чэмпіянату свету па хакеі, якія адбудуцца 12 мая, перадае карэспандэнт БЕЛТА.

У матчы Францыя - Славакія, які сёння ў 16.45 пачнецца ў "Чыжоўка-Арэне", краб Пятровіч прадказаў перамогу французскіх хакеістаў. У спаборніцтве паміж Чэхіяй і Канадай (пачатак у 20.45 у "Чыжоўка-Арэне") марскі прадказальнік назваў фаварытам чэшскіх хакеістаў.

Няпростым для краба стала прадказанне матчу Расія - ЗША. Пры выбары пераможца лядовага пабоішча, якое ў 20.45 стартуе ў "Мінск-Арэне", краб не мог прыняць канчатковае рашэнне амаль 6 мінут. Урэшце рэшт Пятровіч усё ж прадсказаў удачу расійскай зборнай. "Магчыма, маючы адбыцца матч будзе напружаным, перамога будзе няпростай", - пракаменціраваў паводзіны краба Пятровіча дырэктар мінскага цэнтра акіянаграфіі "Адкрыты акіян" Аляксей Азараў.

Паводле яго слоў, вынікі матчаў з удзелам беларускай зборнай Пятровіч прадказваць не будзе. "Краб "балее" за беларусаў... У Інтэрнэце нават з'явіўся ролік, дзе прадказальнік з гонарам нясе беларускі сцяг, - сказаў дырэктар. - Робячы свае прадказанні, Пятровіч не зможа быць непрадузятым пры ацэнцы шанцаў на поспех зборнай краіны, у якой ён жыве".

Пятровіч прадказвае вынік гульняў з дапамогай міні-шайб, якія падаюць яму супрацоўнікі цэнтра акіянаграфіі. З абодвух бакоў на шайбу нанесены выявы сцягоў каманд-саперніц. Чый сцяг пры падзенні на дно акварыума пасля маніпуляцый краба апынецца наверсе, тая каманда і выйграе.

Пераможцамі першых гульняў краб назваў зборныя Канады, Расіі і Славакіі. Па выніках матчаў 9 мая спраўдзілася прадказанне адносна трыумфу расійскай зборнай.

Прадказальнік Пятровіч - краб сямейства камчатыкус, які адносіцца да крабоідаў. Гэта адна з самых старажытных жывых істот на планеце. Яго вылавілі каля берагоў Нарвегіі ў сярэдзіне кастрычніка 2013 года на глыбіні амаль 100 м, даставілі ў Мурманск, а потым адправілі ў Маскву ў спецыяльным кантэйнеры. Пасля гэтага ён прыбыў у беларускую сталіцу.