Падзеі, факты, анонсы

Канцэпцыяй старшынства Беларусі ў СНД у 2013 годзе прадугледжана 70 міжнародных мерапрыемстваў

27 лютага, Гродна /Алена Стасюкевіч - БЕЛТА/. У Канцэпцыі старшынства Беларусі ў СНД у 2013 годзе запланавана каля 70 міжнародных мерапрыемстваў. Аб гэтым сёння на III пасяджэнні Савета па міжрэгіянальнаму і прыгранічнаму супрацоўніцтву дзяржаў - удзельніц СНД паведаміў намеснік начальніка ўпраўлення СНД і ЕўрАзЭС Міністэрства замежных спраў Беларусі Руслан Есін, перадае карэспандэнт БЕЛТА.

На пасяджэнні была прадстаўлена Канцэпцыя старшынства Беларусі ў СНД у бягучым годзе. Як паведаміў Руслан Есін, яе лейтматывам з'яўляецца "Інтэграцыя на карысць чалавека". Сярод асноўных задач канцэпцыі - пашырэнне рэгіянальнага супрацоўніцтва. Менавіта гарызантальныя сувязі сёння маюць найбольш важнае значэнне для развіцця эканомікі і адносін ва ўсіх сферах і ўплываюць непасрэдна на жыхароў рэгіёна, адзначыў ён.

Плануецца правесці цэлы комплекс мерапрыемстваў, у тым ліку па лініі міністэрстваў па надзвычайных сітуацыях, дзяржпагранкамітэтаў, экалагічныя і маладзёжныя форумы, якія прызначаны павялічыць узаемадзеянне менавіта рэгіянальнага характару. Мерапрыемствы будуць накіраваны на ўмацаванне добрасуседства, пашырэнне дыялогу культур. "Мы хочам выкарыстаць міжрэгіянальнае супрацоўніцтва для пашырэння і ўмацавання кантактаў у эканамічнай сферы, дэманстрацыі нашага інавацыйнага патэнцыялу", - сказаў Руслан Есін.

Адным з ключавых мерапрыемстваў стане арганізацыя азнаямленчых тураў для прадстаўнікоў адміністрацыйна-тэрытарыяльных адзінак дзяржаў - удзельніц СНД па еўрарэгіёнах "Нёман", "Днепр" і "Азёрны край". "Мы лічым, што вопыт, які набыты за два дзесяцігоддзі нашай краінай, будзе запатрабаваны на прасторы СНД", - адзначыў Руслан Есін.

Усяго ў плане канцэпцыі прапанавана каля 70 мерапрыемстваў.

Паводле слоў Руслана Есіна, цяпер дзейнічаюць 35 рэгіянальных пагадненняў адміністрацыйных тэрыторый Беларусі з рэгіёнамі Расійскай Федэрацыі, 17 - з Украінай, 3 - з Казахстанам, 3 - з Кыргызстанам, 4 - з Арменіяй, 1 - з Малдовай.

На пасяджэнні савета абмяркоўваліся пытанні, што назбіраліся ў Садружнасці па тэматыцы міжнароднага рэгіянальнага супрацоўніцтва. Таксама ў парадак дня рабочага пасяджэння ў Гродне ўключаны пытанні аб Канцэпцыі міжрэгіянальнага і прыгранічнага супрацоўніцтва дзяржаў - удзельніц СНД да 2020 года, аб праекце Пагаднення па выставачна-кірмашовай і кангрэснай дзейнасці, аб плане работы савета на 2013 год і іншыя.

версія для друку

зрабіць стартавай

дабавіць у выбранае