Падзеі, факты, анонсы

5 мая, Мінск /Кар. БЕЛТА/. Госці ЧС-2014 атрымаюць магчымасць убачыць пастаноўкі ўсіх лялечных тэатраў Беларусі ў час VIII Беларускага міжнароднага фестывалю тэатраў лялек, які пройдзе ў Мінску з 15 па 19 мая. Аб гэтым 5 мая паведаміў журналістам мастацкі кіраўнік тэатральнага форуму Аляксей Ляляўскі, перадае карэспандэнт БЕЛТА.

"У гэтым годзе так супала. Мы не падгадвалі спецыяльна да чэмпіянату свету і вельмі ўзрадаваліся, што тыя, хто прыедзе, змогуць паглядзець усе беларускія тэатры", - сказаў Аляксей Ляляўскі.

Праграма фестывалю сфарміравана або з пастановак паводле класічных твораў, або гэта класіка тэатра лялек. Напрыклад, адкрыецца фестываль "Гамлетам" у выкананні Магілёўскага абласнога тэатра лялек. Як абяцаюць арганізатары форуму, гэта будзе вельмі неардынарная версія класічнага твора. Таксама ў афішы ёсць такія пастаноўкі, як "Тарцюф" (Гомельскі абласны тэатр лялек), "Мантэкі і Капулеці" (Беластоцкі тэатр лялек, Польшча). Усяго будзе 14 спектакляў ад калектываў з Італіі, Ізраіля, Польшчы, Украіны, Расіі і Беларусі.

На фестывалі будзе працаваць дыскусійны клуб, дзе сваё меркаванне змогуць выказаць не толькі тэатральныя крытыкі, але і ўсе жадаючыя. Адзінае абмежаванне - нельга будзе разважаць кароткімі катэгорыямі "падабаецца - не падабаецца". Як растлумачыў Аляксей Ляляўскі, усё ж такі гэта не зусім прафесійная мова. Кожны сход клуба будзе адкрывацца знакамітай музычнай тэмай Георгія Свірыдава "Час, наперад!", якая вядома многім пакаленням па застаўцы да савецкай навіннай перадачы "Час".

Што датычыцца спектакляў, якія будуць ісці на замежных мовах, то вырашана было не рабіць бягучы радок з перакладам, а таксама не раздаваць гледачам навушнікі. Будзе жывы сінхронны пераклад.

Адказваючы на пытанне наконт таго, на якія спектаклі можна схадзіць з дзецьмі, арганізатары адзначылі, што для самых маленькіх будзе цікава пастаноўка Беластоцкага тэатра лялек "Ленка" (ад трох гадоў і старэйшых). Таксама ў праграме ёсць спектаклі для дзяцей старэйшага ўзросту.