Падзеі, факты, анонсы

Дзве ўнікальныя аперацыі дзецям з прыроджанай дэфармацыяй пазваночніка правялі ў Гомелі

Фота з архiва

18 лістапада, Мінск /Кар. БЕЛТА/. У Гомельскай абласной дзіцячай бальніцы 17 лістапада правялі дзве ўнікальныя аперацыі: тут пачаўся этап укаранення распрацаванай па праграме Саюзнай дзяржавы медыцынскай тэхналогіі хірургічнага лячэння дзяцей з прыроджанымі дэфармацыямі пазваночніка, паведамляе БЕЛТА са спасылкай на прэс-службу Міністэрства аховы здароўя.

Аперацыі праведзены двум дзецям 6 і 8 гадоў з прыроджанай дэфармацыяй пазваночніка. Аперыравала брыгада хірургаў, анестэзіёлагаў-рэаніматолагаў і іншых спецыялістаў РНПЦ траўматалогіі і артапедыі, Гомельскай абласной бальніцы і Гомельскай абласной дзіцячай бальніцы на чале з галоўным пазаштатным дзіцячым траўматолагам-артапедам Міністэрства аховы здароўя Дзмітрыем Цесаковым.

Каб такія аперацыі былі магчымы, у Саюзнай дзяржаве распрацавалі сумесную праграму, якая атрымала скарочаную назву "Спінальныя сістэмы".

Медыкі-спецыялісты стварылі ўнікальную дыягнастычную платформу, якая ўключае комплекс клініка-прамянёвых, малекулярна-генетычных і біяхімічных крытэрыяў. Усё гэта дазваляе ацэньваць перспектыву развіцця дэфармацыі на ранніх этапах, каб вызначаць адэкватнае лячэнне і правесці перш за ўсё хірургічнае ўмяшанне ў сувязі з такой прыроджанай дэфармацыяй. У ходзе аперацыі ў пазваночнік устанаўліваецца спецыяльная металаканструкцыя - гэта беларуская распрацоўка, вырабленая з тытанавых сплаваў.

версія для друку

зрабіць стартавай

дабавіць у выбранае