Падзеі, факты, анонсы

16 сакавіка, Мінск /Кар. БЕЛТА/. Трохразовая алімпійская чэмпіёнка зімовых Гульняў 2014 года ў Сочы Дар'я Домрачава заняла 2-е месца ў гонцы праследавання на 10 км з чатырма агнявымі рубяжамі, якая завяршыла ўчора праграму 8-га этапу Кубка свету па біятлоне ў фінскім Контыялахты, паведамляе карэспандэнт БЕЛТА.

Перамагла ў гонцы фінская біятланістка Кайса Мякярайнен, якая ў Контыялахты таксама была лепшай у дзвюх спрынтарскіх гонках. Трэцяе месца заняла расіянка Вольга Зайцава.

Кайса Мякярайнен, якая выйшла на дыстанцыю першай, пасля стартавай стральбы захапіла лідарства і да фінішу не дала магчымасці саперніцам сябе апярэдзіць, нягледзячы на два промахі, якія яна зарабіла ў пасіў. Падагульняючы рэзультат Кайсы Мякярайнен 30 мін. 52 сек. Дар'я Домрачава адпраўлялася на дыстанцыю 20-й, але пасля першага візіту на стрэльбішча і беспамылковага паражэння ўсіх мішэней ёй удалося падцягнуцца да лідзіруючай групы. На наступных двух агнявых рубяжах Домрачава таксама была бездакорная і да таго часу ўпэўнена ўжо ўтрымлівала другую пазіцыю. Нягледзячы на адзін промах у заключнай стральбе, саперніцам не ўдалося адцясніць лепшую беларускую біятланістку, як і ёй самой дагнаць Кайсу Мякярайнен. У выніку з адным промахам Дар'я Домрачава прайграла пераможцы роўна 1 мін. Бронзавы прызёр гонкі Вольга Зайцава ўступіла лепшаму рэзультату 1 мін. 53,4 сек. пры 5 незакрытых мішэнях.

Астатнія беларускі занялі такія месцы: 17-е - Надзея Скардзіна (+3 мін. 29,5 сек.; 5 промахаў), 31-е - Людміла Калінчык (+4 мін. 30,3 сек.; 4), 51-е - Настасся Дубарэзава (+5 мін. 49,7 сек.; 6).

Дар'я Домрачава сярод усіх удзельніц "пасьюта" прадэманстравала лепшую стральбу і 4-ы час у ходзе па лыжні. Цяперашні подыум стаў для яе 56-м за час выступлення на этапах Кубка свету. У яе актыве 18 перамог і 18 другіх месцаў, а таксама 20 узыходжанняў на трэцюю прыступку п’едэстала. Што датычыцца агульнага заліку розыгрышу Кубка свету сезона 2013/14, то лідар беларускага біятлона па-ранейшаму ідзе тут 3-й (650 ачкоў). Другое месца прадаўжае займаць нарвежка Тура Бергер (724), а ўтрымліваць лідарства - Кайса Мякярайнен (781), для якой дамашні кубкавы этап у Контыялахты склаўся проста феерычна. Барацьба за Вялікі хрустальны глобус у жанчын яшчэ не завершана.

У мужчын сітуацыя прама процілеглая. Учарашні фініш на 2-м месцы ў мужчынскай гонцы праследавання Мартэна Фуркада зрабіў француза недасягальным для сапернікаў у агульным заліку Кубка свету. На яго рахунку 790 ачкоў. У нарвежца Іаханэса-Цінэса Бё, які выйшаў на 2-е месца, 560 балаў. Нават пры ўмове заваявання максімальнай колькасці ачкоў у астатніх заліковых гонках ён не здолее пацясніць лідара з першай пазіцыі.

Заключны кубкавы этап гэтага біятлоннага сезона пройдзе з 20 па 23 сакавіка ў нарвежскім Холменколене.