Падзеі, факты, анонсы

2 чэрвеня, Мінск /Кар. БЕЛТА/. Адміністратар Праграмы развіцця ААН (ПРААН) Хелен Кларк у час свайго візіту ў Беларусь намініравала трохразовую чэмпіёнку Алімпіяды-2014 Дар'ю Домрачаву паслом добрай волі ПРААН. Цырымонія адбылася 31 мая ў Мінскай гарадской ратушы, перадае карэспандэнт БЕЛТА.

Дар'я Домрачава, вядомая ва ўсім свеце беларуская біятланістка, прыме ўдзел у дзейнасці ПРААН у галіне папулярызацыі здаровага ладу жыцця сярод дзяцей, падлеткаў і дарослых у Беларусі.

"Мне вельмі прыемна вітаць Дар'ю ў якасці пасла добрай волі ААН. Задача ПРААН ва ўсім свеце - аказваць станоўчы ўплыў на жыццё людзей, і нам вельмі прыемна, што Дар'я Домрачава падтрымае нас у гэтай высакароднай справе, - адзначыла Хелен Кларк. - Вялікая папулярнасць Дар'і сярод грамадзян Беларусі, і асабліва сярод маладога пакалення, пераконваюць мяне ў тым, што яна стане для іх прыкладам здаровага ладу жыцця".

Паводле слоў Хелен Кларк, Дар'я Домрачава з'яўляецца ўзорам волі і адданасці сваёй справе. Спартсменка займаецца дабрачыннасцю і дапамагае хворым дзецям. Адміністратар ПРААН выказала ўпэўненасць, што алімпійская чэмпіёнка, уступіўшы на новую пасаду, натхніць яшчэ больш маладых людзей весці здаровы лад жыцця і адмовіцца ад шкодных звычак. "Гэта менавіта тая ідэя, якую мы хочам данесці", - падкрэсліла яна.

У сваю чаргу спартсменка прызналася, што ганарыцца сваёй новай місіяй. Дар'я адзначыла, што і раней папулярызавала здаровы лад жыцця, але цяпер дзякуючы супрацоўніцтву з ААН зможа дабіцца яшчэ большых вынікаў у гэтай справе.

Дар'я Домрачава - трохразовая алімпійская чэмпіёнка: заваявала тры залатыя медалі на XXII Зімовых Алімпійскіх гульнях-2014 у Сочы. Бронзавы прызёр XXI Зімовых Алімпійскіх гульняў-2010 у Ванкуверы; двухразовая чэмпіёнка свету па біятлоне (2012 і 2013 гады), трохразовы сярэбраны прызёр чэмпіянатаў свету па біятлоне (2008, 2011 і 2012 гады). Спартсменка з'яўляецца ўладальніцай і іншых ганаровых узнагарод.