19 жніўня, Мінск /Кар. БЕЛТА/. Беларуская спартсменка Марына Арзамасава выйшла ў фінал Алімпіяды ў бегу на дыстанцыі 800 м, паведамляе карэспандэнт БЕЛТА.
Марына Арзамасава з'яўляецца дзеючай чэмпіёнкай свету ў гэтай дысцыпліне. З самага пачатку свайго алімпійскага паўфінальнага забегу яна захапіла лідарства і не ўступала першую пазіцыю нікому да самай фінішнай прамой. Аднак захаваць сваю перавагу прадстаўніца Беларусі не змагла. Яе абышлі тры саперніцы, уключаючы даволі вядомую бягуху з ПАР Кастэр Сяменю. Арзамасава фінішавала чацвёртай з рэзультатам 1 мін 58,87 сек, не трапіўшы ў дуэт спартсменак, якія кваліфікаваліся ў фінал. Тым не менш трэці паўфінальны забег аказаўся самым хуткім сярод усіх, і Марына без праблем адабралася ў фінал па часе. Яе рэзультат стаў чацвёртым сярод усіх паўфіналістак. Лепшай з усіх удзельніц гэтага раўнда была Кастэр Сяменя - 1 мін 58,15 сек.
У папярэднім забегу Арзамасава пераадолела 800 м за 1 мін 58,44 сек. Фінальны забег на гэтай дыстанцыі адбудзецца ў заключны дзень Алімпіяды - 21 жніўня.