Падзеі, факты, анонсы

31 студзеня, Мінск /Кар. БЕЛТА/. Афіцыйнае адкрыццё алімпіскай вёскі ў горным кластары, дзе будуць пражываць большасць беларускіх спартсменаў на зімовых Гульнях-2014 у Сочы (Расія), адбылося 30 студзеня, паведамілі БЕЛТА ў прэс-службе Нацыянальнага алімпійскага камітэта (НАК). Першымі з беларусаў у яе засяліліся біятланісты.

У Сочы 29 і 30 студзеня прыбылі беларускія біятланісты. З 30 студзеня дазволена праводзіць трэніроўкі на алімпійскай трасе комплексу для біятлона і лыжных гонак "Лаура", чым айчынныя страляючыя лыжнікі ўжо скарысталіся. Надвор'е ў горным кластары добрае. У прылеглым пасёлку Красная Паляна цёпла і сонечна. У гарах, дзе размешчаны спартыўныя аб'екты, халадней, напярэдадні выпаў снег.

Горная алімпійская вёска, разлічаная на 2,6 тыс. спартсменаў і членаў дэлегацый, была ўзведзена будаўнікамі гарналыжнага комплексу "Ружа Хутар" на працягу двух гадоў. Галоўнае месца размяшчэння ўдзельнікаў і гасцей Гульняў-2014 у горным кластары ўяўляе сабой сучасны пасёлак, які складаецца з 42 катэджаў у "альпійскім стылі", размешчаных на вышыні 1130 м над узроўнем мора. Вёска займае плошчу 23 га і знаходзіцца ў непасрэднай блізкасці ад двух алімпійскіх аб'ектаў: экстрым-парку "Ружа Хутар" і аднайменнага гарналыжнага цэнтра. Дабрацца да горнай алімпійскай вёскі можна па новай аўтамабільнай дарозе, што звязала горад сочынскага рэгіёна Адлер і пасёлак Красная Паляна. Акрамя таго, госці змогуць скарыстацца канатнай дарогай "Алімпія", верхняя станцыя якой размешчана ў пешай даступнасці ад вёскі. Пасля завяршэння Алімпійскіх і Паралімпійскіх гульняў у Сочы гэта вёска стане часткай горнага курорта "Ружа Хутар".

Акрамя алімпійскай вёскі, комплексу для біятлона і лыжных гонак "Лаура", экстрым-парку (для фрыстайла і снаўборда) і аднайменнага гарналыжнага комплексу "Ружа Хутар" у склад горнага кластара ўвойдуць комплекс для скачкоў з трампліна "Рускія горкі" (у ім таксама адбудуцца спаборніцтвы па лыжным дваябор'і) і цэнтр саннага спорту "Санкі" (бабслей, скелетан, санны спорт). Цэнтральным аб'ектам прыбярэжнага кластара стане Алімпійскі парк. Ён аб'яднае ўсе спартыўныя аб'екты, паркавую зону і аб'екты інфраструктуры: алімпійскі стадыён "Фішт" (цырымоніі адкрыцця і закрыцця Гульняў), лядовы палац "Вялікі" (хакей), лядовую арэну "Шайба" (хакей), кёрлінгавы цэнтр "Ледзяны куб", палац зімовага спорту "Айсберг" (фігурнае катанне, шорт-трэк) і "Адлер-Арэну" (канькабежны спорт).

БЕЛТА будзе аператыўна асвятляць падзеі XXII зімовых Алімпійскіх гульняў. У Сочы адпраўляюцца карэспандэнт і фотакарэспандэнт вядучага інфармацыйнага агенцтва Беларусі. Зімовая Алімпіяда-2014 адкрыецца ў Сочы 7 лютага, а ўрачыстая цырымонія закрыцця адбудзецца 23 лютага. Удзельнікі галоўных стартаў зімовага сезона разыграюць 98 камплектаў узнагарод у сямі відах спорту.