18 жніўня, Мінск /Кар. БЕЛТА/. У швейцарскім Цюрыху напярэдадні завяршыўся чэмпіянат Еўропы па лёгкай атлетыцы. Зборная Беларусі заняла на кантынентальным турніры 10-е месца ў медальным заліку з дзвюма залатымі ўзнагародамі, паведамляе карэспандэнт БЕЛТА.
У апошні спаборніцкі дзень (17 жніўня) беларускія атлеты выступалі ў двух фіналах і ў абодвух былі блізкія да п'едэстала, заняўшы чацвёртыя месцы. Штурхальніца ядра Юлія Леанцюк у лепшай спробе паказала рэзультат 18 м 68 см. Венгерка Аніта Мартан, якая заваявала ў гэтым лёгкаатлетычным відзе бронзу, адправіла снарад на 36 см далей (19 м 04 см), а чэмпіёнкай стала немка Крысціна Шваніц (19 м 90 см). Беларуска Алёна Дубіцкая заняла ў фінальных спаборніцтвах па штурханні ядра 7-е месца (17 м 95 см), а Алена Копец паказала 9-ы рэзультат (17 м 65 см).
У фінальным забегу на 3000 м з перашкодамі беларуска Святлана Кудзеліч устанавіла новы асабісты рэкорд, скінуўшы з ранейшага дасягнення амаль 2 сек. - 9 мін. 30,99 сек. Некаторы час у вырашальным забегу беларуска лідзіравала, аднак не ўтрымалася ў тройцы на апошнім крузе і фінішавала чацвёртай. Перамагла немка Анцье Мельднер-Шміт (9 мін. 29,43 сек., лепшы асабісты рэзультат сезона).
Па выніках чэмпіянату Еўропы-2014 па лёгкай атлетыцы беларускія спартсмены заваявалі дзве залатыя ўзнагароды. Андрэй Краўчанка выйграў спаборніцтвы ў дзесяцібор'і, а Марына Арзамасава - у бегу на 800 м. Зборная Беларусі заняла 10-е месца ў медальным заліку турніру. Лепшымі ў намінацыі аказаліся лёгкаатлеты Вялікабрытаніі, у актыве якіх 23 (12 залатых, 5 сярэбраных, 6 бронзавых) узнагароды. У тройку лепшых увайшлі французы, якія маюць таксама 23 (9, 8, 6) узнагароды і немцы - 8 (4, 1, 3). Расійскія спартсмены сталі чацвёртымі - 22 (3, 6, 13).
Удзельнікі кантынентальнага турніру разыгралі 47 камплектаў узнагарод. Чэмпіянаты Еўропы па лёгкай атлетыцы праводзяцца з 1934 года і раней у асноўным арганізоўваліся адзін раз у чатыры гады. З 2012 года прынята рашэнне праводзіць турнір раз у два гады. На папярэднім чэмпіянаце ў фінскім Хельсінкі-2012 беларусы сумарна заваявалі 6 (2 сярэбраныя, 4 бронзавыя) узнагарод.
Пн | Аўт | Сер | Чцв | Пт | Сб | Нядз |
---|