Падзеі, факты, анонсы

22 снежня, Мінск /Кар. БЕЛТА/. Вядучая беларуская гарналыжніца Марыя Шканава стала пераможцай у слаламе спаборніцтваў, што прайшлі ў швейцарскім Санкт-Морыцы пад эгідай Міжнароднай федэрацыі лыжнага спорту (FIS). Акрамя таго, яна выйграла сярэбраную ўзнагароду ў другой дысцыпліне - гіганцкім слаламе, паведамілі карэспандэнту БЕЛТА ў Беларускай федэрацыі гарналыжнага спорту і снаўборда (БФГСС).

Шканава атрымала перамогу ў слаламе з сумарным часавым рэзультатам па выніках дзвюх спроб - 1 мін. 44,19 сек., прычым перавага беларускай гарналыжніцы над усімі канкурэнтамі, уключаючы прызёраў у гэтай дысцыпліне, аказалася велізарнай. Швейцарская гарналыжніца Анна Шнайдэр, якая заняла другі радок у падагульняючым пратаколе, адстала ад Шканавай на 2,62 сек., што па мерках слалама з'яўляецца сур'ёзным гандыкапам, а харватка Іва Місак, якая стала трэцяй, уступіла 3,65 сек.

На другую прыступку п'едэстала гонару Марыя Шканава ўзнялася па выніках спаборніцтваў у гіганцкім слаламе. У гэтай дысцыпліне яе час, затрачаны на дзве спробы, склаў 2 мін. 20,54 сек. Пераможца старту швейцарка Алена Джылі выступіла хутчэй на 0,67 сек.

У снежні на спаборніцтвах пад эгідай FIS Марыя Шканава ўжо заваявала ўзнагароды усіх вартасцей. Як раней паведамлялася, яна стала ўладальніцай бронзы ў французскім Валь Тарансе на трасе гіганцкага слалама. У нацыянальнай федэрацыі гарналыжнага спорту падкрэсліваюць, што стабільнасць спартсменкі менавіта ў гэтай дысцыпліне асабліва абнадзейвае, паколькі яна з'яўляецца ключом да ўсіх астатніх відаў гарналыжнай праграмы. "Анамальна цёплае надвор'е ў Еўропе збірае цяпер на кожны неадменены старт вялікую колькасць удзельнікаў. У такіх нялёгкіх умовах Марыя Шканава выглядае вельмі пераканаўча, пастаянна паляпшаючы сваю спартыўную форму. Спартсменка выканала вялікі аб'ём работы ў летні перыяд і, на думку трэнера нацыянальнай каманды Беларусі славенскага спецыяліста Ежы Малуша, гэта стала залогам паспяховага пачатку сезона", - канстатавалі ў БФГСС. У федэрацыі спадзяюцца на прагрэс рэзультатаў спартсменкі і на этапах Кубка свету. Там яна будзе сапернічаць з мацнейшымі гарналыжніцамі свету.

Што датычыцца выступленняў мужчын зборнай Беларусі, то яны ў новым сезоне пакуль больш сціплыя. На тых жа спаборніцтвах у Санкт-Морыцы ўдзельнік зімовай Алімпіяды-2014 Юрый Данілачкін заняў 28-е месца ў гіганцкім слаламе і 33-е ў слаламе. Яго больш малады калега па камандзе Данііл Чэрцін спыніўся на 63-й пазіцыі ў слаламе і 74-й у гіганцкім слаламе.