Падзеі, факты, анонсы

3 верасня, Мінск /Кар. БЕЛТА/. Беларуская бягуха Аліна Талай заняла 2-е месца на 12-м этапе Сусветнага выкліку па лёгкай атлетыцы ў бегу на 100 м з бар'ерамі, які адбыўся ў харвацкай сталіцы Загрэбе, паведамляе карэспандэнт БЕЛТА.

У сваёй профільнай дысцыпліне вядучая беларуская лёгкаатлетка з групы спрынту фінішавала з рэзультатам 12,98 сек. Пераможца Ніа Алі (ЗША) паказала час 12,92 сек, а трэці прызёр Тыфані Портэр (Вялікабрытанія) - 13,01 сек. Аліна Талай прабегла дыстанцыю на адну сотую секунды павольней у параўнанні са сваім рэзультатам фінальнага забегу на нядаўнім чэмпіянаце Еўропы-2014 у швейцарскім Цюрыху. Тады беларуска стала толькі 5-й. Асабісты рэкорд спартсменкі на 100 м з бар'ерамі - 12,71 сек.

Этапы Сусветнага выкліку па лёгкай атлетыцы гэтага сезона складваюцца для беларускіх спартсменак даволі паспяхова. Чэмпіёнка Еўропы 2014 года ў бегу на 800 м Марына Арзамасава стала пераможцай спаборніцтваў з гэтай серыі, што праходзілі ў пачатку чэрвеня ў мараканскім Маракешы. Там яна прабегла каронную дыстанцыю за 2 мін. 00,71 сек. Чатыры дні таму на 11-м этапе Сусветнага выкліку ў Берліне (Германія) яна заняла ў сваім відзе 3-е месца (2 мін. 00,40 сек.). Там жа Святлана Кудзеліч у бегу на 3000 м з перашкодамі ўзышла на другую прыступку п'едэстала, абнавіўшы асабісты рэкорд (9 мін. 27,95 сек.).